Roia'tatokénhti Regis Kanien'kehá:ka Onkwehón:we Wahonwatihiatónhseron ne Opiod Nia'té:kon Ronnón:ni Tánon Tehonrienià:tha

AKWESASNE – Ne Roia'tatokénhti Regis Kanien'kehá:ka Onkwehón:we wahonwatihiatónhseron ne kakorahtshera'kó:wa tsi tethatiia'torehthà:ke rontenonhkwa'tsherón:ni nia'té:kon ronnón:ni tánon tehonrienià:tha tsi na'akokarónnia'te thí:ken onónhkwa Opioids ratina'tónhkhwa ne tsi niionkwè:take ratinákere ne Ahkwesáhshne. Ne onkwehón:we ronnéhsaks iahonwatirihwahéhrhahse tsi nikanó:ron wahontkarón:ni tsi wa'thatirihwa'será:ko onkwe'tà:ke raonata'karitéhtshera wa'tka'nikonhrhá:ren né:'e aorì:wa kí:ken opioid wa'kahnhá:tari'ne.

Kí:ken wahonwatihiatónhseron, tsi niká:ien ronwatihiatonhserá:wi ne Ohstoronòn:ke Iokwèn:rare tsi thatirihwénhtha ne Othorè:ke Iokwèn:rare ne Kanón:no ne Tsiothóhrha 21, 2018

Wa'thatirihotáhrhoke thí:ken ne Kanenhraién:ton tsi niká:ien ronnón:ni, rontkè:rons, tánon tehonrienià:tha opioids wa'thonwatirihwaierónnien wahonwennónnien ne rontétsien'ts tánon rotinonhwaktanión:ni aontahonnéhtahkwe thí:ken tkahiatonhseríson opioids aten'nikonhráhtshera, í:iah khia'taiesatkónthahse nó:nen énhsatste ka'nón:we nisahkará:rens, tánon énhsatste í:iah thé:nen tha'taesa'nikonhrhá:ren. Raotirihwaierónhtshera tontá:kerahkwe aonhá:'a tewahétken ón:kwe-raotirihwá:ke wa'kahnhrá:tari'ne ne ón:wa nikahá:wi shakotitsièn:tha tsi nontaiohtonhákie tánon tsiorì:wa wa'kanataká:ri ne onkwehonwè:ne kanatakè:ron, thó ratiia'tarákie ne Roia'tatokénhti Regis Kanien'kehá:ka Onkwehón:we.

"Ne Opioid wa'kahnhrá:tari'ne sénha é:so wa'akokenhren'serón:ni tánon kwáh é:so wahontkarón:ni ne onkwehonwè:ne ne ónhka aontaionnonhtonnión:ko," wa'ì:ron ne Onkwehón:we Iakoteríhonte Beverly Cook. Iakoteríhonte Cook wa'ì:ron thó:ha kwáh tsi nikanèn:ra "Skanekeráhtshera ne Onkwehón:we raononkwe'ta'shón:'a thó ronatehiahrónkie ahshá:takon ne opioid wa'kahnhrá:tari'ne, skáthne í:non niió:re ia'tentewanentshaníhara'ne tsi nenionkwaià:tawen ia'tekaiéhston ne tsi nikiawén:'en ronwatihteronhkwé:ni thí:ken onkwaná:ta ronatahkatstá:ton. Ratiksa'okón:'a tsi niká:ien ne ronwatiio'okón:'a tehonwati'nikonhraténion ne opioids – ratiià:tare ne owira'shón:'a ronanekará:ton skáthne ne opioid entá:on'k énhontste ne takarihón:ni ne shakoti'niksténha opioid wà:kontste tsi nikarì:wes kontiwirenhá:wi – iotká:te entá:on'k a'é:ren enhonwatiia'tenhá:wihte ne raotinónhskon."

Ne Roia'tatokénhti Regis Kanien'kehá:ka Onkwehón:we tehonatohétston ók nenhotiià:tawen ne opioid wa'kahnhrá:tari'ne, í:kare ne ata'karitéhtshera tsi nahotiià:tawen ne aonkwe'ta'shón:'a tánon raotihwá:tsire, ontehià:ron ne ratiksa'okón:'a tehonwatíhshnie tánon rotiwiranónhnha tánon sewaterihwate'wáhton. Ne Onkwehón:we nia'té:kon wahonterihwahténkia'te ken'niahatí:iere takonwá:tsha kí:ken wa'kahnhá:tari'ne, tahontáhsawen nia'té:kon wahonte'nién:ten takonwá:tsha opioids tóhsa ahontsté:riste ne ken'nithotiión:sa tóka ó:ni ónhka í:iah teiakononhkwa'tsherá:ien, tánon onkwe'tà:ke wahonwati'nikonhraientáhten tsi niiótteron ne opioid á:iontste tánon oh ní:ioht ne ahonwatihró:ri. Ne onkwehón:we iehatíhe thí:ken opioid ísi nón:we niióntstha tánon iehoti'nikonhrénha kieiokontáhkwen aktónkie ne 85-90% ne ratiksa'okón:'a tehonwatíhshnie khia'teiohserá:ke akwé:kon ne wísk niiohserá:ke tsi náhe. Khehkarákie tsi nikanó:ron iahonwatiia'ténhawe ne ratiksa'okón:'a – ienhonwatì:teron ken'nikarihwésha tóka ó:ni ienkakón:tahkwe ákte nón:we tkanónhsote enhonwanaten'nikòn:raren tóka shí:ken í:iah thó té:iens ne ónhkak ne kahwá:tsire akaonkwè:ta ne aiekwé:ni ahonwanaten'nikòn:raren.

Ne Roia'tatokénhti Regis Kanien'kehá:ka Onkwehón:we ó:ni é:se thonatká:wen iontstha'shón:'a takonwá:tsha ne opioid wa'kahnhrá:tari'ne thiká:te teiakóhshnie iokwenhrá:ron ronahkwísron aontahonwatíhne ne ahonat'kariióhake tánon ahonata'karí:teke akwé:kon ne Onkwehón:we raononkwe'ta'shón:'a. Aronhákien tsi nihonahkwísron, ne onkwe'tà:ke ata'karitéhtshera teka'nikónhrhare ontehià:ron ne arihón:ni iewatahsontéhrha thotirihwá:re tehonterihowanáhtha tánon ieiaohetstáhkwen tehonrenià:tha ne opioid iontstha'shón:'a ne ronnón:ni tánon tehonrienià:tha.

"Opioids tehotiténion tsi nikaieron'tò:ten ne kia'tewenhniserá:ke tsi ronhtenkià:tha tánon tsi ionhnhékie ne Onkwehón:we khia'teiotikióhkwake tsi ní:ioht, í:kare iotehiahrónkie kaien'kwáksen kiaté:ron sewaterihwate'wáhton teio'nikónhrhare ne sewaterihwate'wáhton tkarihwaié:ri aoianerénhsera ne tsi ní:wa, ieskaiéhston iontstha'shón:'a róntstha ne onkwe'tà:ke tánon tsi tehontawén:rie tsi nahò:ten ratíhsere ronteweiénstha, wahoná:ti tsi nón:we nihotiió'te ahonkio'tenhserakié:nihte ne arihón:ni ne opioid tenhonwati'nikonhraténion tsi na'tehónteron ne rotiio'ténion, tánon thikió:konte tekiawé:non opioid ísi nón:we nihóntstha kanatakwé:kon," wahèn:ron Onkwehón:we Roteríhonte Michael Conners.

Roteríhonte Conners iahá:iehste, "Wa'tharihwa'será:ko, ne Onkwehón:we khieiokontáhkwen ákte nenhatí:ien iontstha'shón:'a ne kaien'kwáksen ísi nón:we nihóntstha ahatíhnhe'ne tánon ahonwatirihónnien, thiká:te raotinonhskónhshon tehonwatíhshnie tsi ratíhsere Ata'karitéhsthera Kaia'takehnháhtshera, ratì:teron tehonwatíhshnie ne Partridge Kanónhsote, tehonatawén:rie kaia'takehnháhtshera rontoweiénstha ratíhsere, onkwe'tà:ke aten'nikonhrátshera tánon ne Ronwatitsièn:tha ne Shonatkwatakwenhákie Tsi Tehshakotirihwénhtha, tsi ní:ioht ne ahonkià:taren ne kaná:ta akanenhrón:ni ne rotirì:waien aontaio'serón:nenhte kahiatonhseríson ne kaien'kwáksen ísi nón:we nihóntstha."

Aronhákien ne Onkwehón:we tsi é:so thó nahtká:wen ne iontstha'shón:'a takonwá:tsha ne opioid wa'kahnhrá:tari'ne tsi wa'okenhren'serón:ni ne onkwaná:ta í:iah ákta tháonhte aontónhtka'we akwé:kon ne kaia'takenhnháhtshera thí:ken ne aonkwe'ta'shón:'a. tehonatonhontsió:ni nón:wa tánon ienwatahsónteren tenhonatonhontsionníhake ne tsi niió:re ia'tehatiká:nere tsi nén:we. Ne onkwehón:we thonatoktá:ni akanonhsó:take ne kwáh token:'en aonsahatiie'wénta'ne, iahonwanató:ri Onkwehón:we raononkwe'ta'shón:'a tsi nihá:ti enhatíhsa tsi tehonwatíhshnie ne opioid rotiié:nen iaonsahón:newe tsi nón:we thonatáhsawen róntsthahkwe ne opioids.

"Tsi nikarì:wes ne Roia'tatokénhti Regis Kanien'kehá:ka Onkwehón:we é:so thonatká:wen iontstha'shón:'a takonwá:tsha ne opioid teka'nikónhrhare wa'thatirihwa'será:kon ne teka'nikónhrhare ó:ni teiotonhontsióhon thí:ken tsi niká:ien eh nihotiié:ren, ratikária'k tsi nahatí:iere tánon a'é:ren shá:with ne í:iah thé:nen tánon tekarihwáhstha tsi ní:ioht tsi wahshekarewahtánion ne Onkwehón:we" wahèn:ron Onkwehón:we Roteríhonte Eric Thompson. Roteríhonte Thompson wahèn:ron "Ne opioid wa'kahnhratari'ne í:'i tha'teiokeronnión:'on. Thiká:te, tsi í:we, né:'e ia'tehatiká:nere tsi neniá:wen'ne ne opioid ronnón:nis tehonrenià:tha tehonterihwarenià:tha tánon tehonrenià:tha ne kwáh é:neken kiótte teiako'nikonhraténies opioids iontstha'shón:'a, tsi nikarì:wes thihonnéhtha ehtá:ke ronnón:ni ne tsi niiorihowá:nen taka'niósken'ne."

Ne Roia'tatokénhti Regis Kanien'kehá:ka Onkwehón:we ronwatihshennakaratá:ton ne Keller Rohrback L.L.P. Seattle, Washington nón:we thèn:teron.