Kanaiesáhtshera Shontaió:karahwe

Iehiá:tons Kaniehtonkie

Kwáh ióhskats watenaiéhston tsi niwahsohkò:ten tánon ratiweientehténion ne nia'té:kon ahonnonnianion ne "Kanaiesáhtshera Shontaió:karahwe" (FAD) watenaiéhston óksak tontáhsawen sha'té:kon niiohwistá:'e o'karahshnéha ne Tsi Ionthonwaientáhkhwa Tethonkierónnions ne tsi Kaná:taien ne Entákta o'karahshnéha. Tsi ronnatenaiéhston wahonwatihsennakará:tate énska iawén:re ratihsennowá:nens sha'oié:ra Onkwehón:we ronatenaiéhston kontihnonniánions, ià:ia'k nikón:ti Ahkwesahshró:ron. Ne FAD watenaiéhston ne "kontiia'tarónnion" ne watenaiéhston wa'konwatihsennakará:tate kontinaiéhstha, tsi nikón:nas tánon tó:'k nikontihnén:ies – akwé:kon ne konnón:kwe ioniahesa'ténion.

Kenhnisa'ánion í:kare ne ón:wa nikahá:wi onkwehón:we kanaiesáhtshera: í:ions wakia'tawì:tsheres, khia'tewenhniserá:ke atsherónnia tánon teionhthenno'okstáhkhwa atsherónnia tánon sénha é:so ne Onkwehonwehnéha atsherónnia kénhnare ka'nikhónnion wátston ne teiohshwáthe nia'tewahsóhkwake oniátsha tánon tekatsi'nehtará:ron; kontinaiéhstha wa'konhtén:ti ionatonhnháhere tsi ionatenaiéhston tsi niionkwarihò:ten. Ronakiohkowá:nen ratihnón:ni ronnéhsaks na'tekénhnake ratirihwíhsaks tsi niká:ien aónha ióhskats tánon tkaié:ri, tánon Emma Shenandoah wa'ì:ron, "É:so tsi nikionkwé:non í:kare ne iorihwakaión:'on atahkwénnia tsi niká:ien tewátsthahkwe, tsi ní:ioht tsi tewanákere tánon tsi niionkwaia'tawén:'e ne Rotinonhsón:ni onkwehshón:'a. Í:kehre akì:ron niá:wen kwáh é:so tsi rarihwaienté:ri rothiatonhseraweiénhston tsi nikionkwé:non Jamie Jacobs tsi niho'nikonhrí:io taharihwa'será:ko tsi nahò:ten wahiri'wanón:tonhse ne ionkhihsothokon'kénha atsherónnia. Ó:ni ne Gwen Saul wa'onkena'tón:hahse oh nà:ken tsi nahò:ten ká:ien ne tsi iokaionseraientáhkhwa iontstha'shón:'a."

Ne atahkwénnia kwáh ióhskats iontorioktáhkhwa tánon iahá:tsiehste CKON's Reen Cook tánon Onkwehon:we Max Magazine's Kelly Holmes, iekiatahsontéhrha ahonwennónnien ahotiiéshon tánon ahonatshennonníhake tsi akwé:kon wahottikitsheratkè:ron ne Tsi Ionthonwaientáhkhwa Tsi Tethonkerónnions.

Tsi Ionthonwaientáhkhwa Tsi Tethonkerónnions raia'takwe'ní:io ne raó:wen, Larry Sylvain wahèn:ron, "Kwáh iorihowá:nen – ne kén:tho akontená:iehste. Kwáh ionkwatonhnháhere skáthne taionkwaienawa'khónhake kí:ken onterihwahtén:ti, wa'onkwaianeráhsten."

Tisha Thompson tánon ontakién:'a Babes kenniia'takwe'niióhne kí:ken onterihwahtén:ti wahontená:iehste. Akwé:kon tsi wa'kontkonhsaserón:ni tho nontá:we ne Babes Iontkonhsahseronnia'táhkhwa - okióhkwa aoná:wen tánon teiotiienawá:kon, kiahtenkià:tha ne kiatakié:'a. Tisha Thompsaon wa'ontaténi kí:ken skáthne ne Indian Time, "Kí:ken ronatenaiéhston wahonterihwahténkia'te ahonwati'nikòn:ron tánon ahonwatihretsiá:ron ne onkonkwe'ta'shón:'a. Kwáh ken' nihá:ti ne onkonkwe'ta'shón:'a nia'té:kon ratiweién:te. Ratihnísa'as, shakotikonhsahserón:nis, shakotiko'tsión:nis, kontenaiéhstha. Ken'niwahsontá:te wa'okén:ta'ne. Aiá:wens akwé:kon wahonnon'wéskwen wahonterò:roke né:'e ne ionkwatenenhrón:ni ronahtenkiá:ton. Niawenhkó:wa."

Ronatonhnháhere tánon, ó:nenk tsi tekatokenhstánion tsi ní:ioht tsi kakwatákwen ne "Kontenaiéhstha Iotohétston tsi Na'tekió:karas," Nio Perkins, Niio Perkins Iakohníson, ó:ia nontaieié:ra'te tsi wa'ontená:iehste, oh nà:ken tsi nón:we, nihonatenaiéhston, tsi rontenaiéhstha thiká:te tsi ratika'én:ions, teiotenonianíhton! Enhshé:ken ne ratirihwahseronniánions, rontenonhkwiseróhtsions! Tánon kontenaiéhstha enkónkien tánon enkontehrhá:rate ioti'nikonhrí:io oié:ri nikahwistá:'eke nikarì:wes tsi niió:re entewatáhsawen ne enkontená:iehste. Nó:nen enwató:'kten iorihowá:nen: Ia'é:iehste "Né:'e kí:ken kiokierénhton iohseratákie enkáhtka'we ne akwatsheronniáhtshera tánon kwáh é:so tsi wakatonhnháhere tánon kená:ie. Í:se akwé:kon tesewarihón:ni. Tetewatenonhwará:tons tsi niionkwarihò:tens tánon tsi nahò:ten kionkwetáhkwen teiakononhware'táhkhwakwe kénhne ne eh nón:we, tho nón:we sonke'satsténhseron. Ó:kia'ke tehonatakiénhton tsi nihatiia'tò:ten í:'i (Iakionhnón:nis / iakwenhnísa'as) iakwate'niéntha aiakón:ni skáthne taionkwaienawa'khónhake. Í:kehre tsi nihá:ti thonaterohrokhónhne wahónttoke. Setewaná:ie, onkonkwe'ta'shón:'a tsionkwe'tátshon tánon tsi kionkwetáhkwen tsi niionkwarihò:ten. Niawenhkó:wa akwé:kon tsi nihá:ti wa'onkhihshnié:non ne aiakwaterihwaténkia'te."

Marlana Thompson, sá:ionwe ó:nen wahón:nise shiiakohténkion, taionten'nikonhráhtka'we ne FAD. "Tontakahtén:ti, sá:kewe ne BC ó:nen ontawén:rate ne tsióhsera tánon shé:kon wakehiahrónkie tsi wakatenhninónhtsherote. Onkwatera'shwíiohste aonkeri'wanón:tonhse akatená:iehste ne akio'ténhsera ne kontenaiéhstha shontaió:karahwe ronaterihwahtenkià:ton. Kwáh é:so tsi wakatonhnháhere né:'e tsi né:'e kí:ken ne kwáh kiokierenhtáhkwen iorihowá:nen ioterihwahtenkià:ton ne kontenaiéhstha tsi náhe sewá:ko. Ia'tewakerihwaién:ta'se akihnahseronniánion tsi nón:we niwakataterakwén:ni ne tetsiá:ron ronnón:kwe tánon konnón:kwe tánon Tisha taión:kon kwáh ken'nihá:ti iotineráhkwa kontenaiéhstha ákte na'tekón:nas tánon tsi nikahiá:ton kóntstha – kwahtokén:'en Kanien'kehá:ka oia'ta'shón:'a. Thó takatáhsawen waki'nonniánion akwé:kon ákontste ne kontenaiéhstha. Oh nà:ken kwáh ken'nikón:ti sonkonkwe'taién:ta'ne teionatonhontsió:ni akonthahíta tsi ionthahita'áhstha tánon oié:ri ní:kon tahontkahronkiéhseron – ronatenaiéhston ne onkwehonwehnéha raonakià:tawi ronakiokowá:nen ne tehontohétstha ratinòn:wes ahonkià:tawi'te tánon ahontená:iehste tsi nihatinorónhkhwa tsi nihatinorónhkhwa tsi nihotirihò:ten nó:nen enhatiié:na ne raotihiatónhsera teiontohetstáhkhwa tánon thiká:te ratika'én:ions ne khia'tewenhniserá:ke ronkia'tawì:tha, onkwehonwehnéha atahkwénnia ne Kanonhséshne nonkwá:ti ronkia'tawì:tha tánon oh na'kénhkha enhsakia'tahserónnia'te ne enhshiá:ken'ne. Ionakiokowá:nen ne kontenaiéhstha né:'e ne kiokierénhton tánon kwáh wa'kontená:iehste. Ne akwé:kon kwáh wahsontiiohstón:ne tánon tsi niionkwehnéhne ne Onkwehón:we wa'akhí:ken iahotikehtohtánion taionkhinòn:waron tsi niká:ien ionkwenhníson tánon i:'i onkwá:wen nahò:ten ionkwatenaiéhston, aionkhí:ken tsi na'tontaiakwá:ra'ne ne tsi iohatákie sha'tontaionkwaiaken'enhákie ne Tsi Ionthonwaientáhkhwa Tethonkierón:nions - kwáh wa'onkwa'nikonhrakará:tate!"

Kanaiesáhtshera Shontaió:karahwe ronatenaiéhston kontihnonniánions í:kare:

Terry Cree, Ahkwesáhshne. Kontenaiéhstha ne Hayley Cree, Karley Cree, Lauren Cree, Nolie Thompson, Sienna Chubb tánon Karyss Terrance, Iakoko'tsión:nis ne Lauren Cree tánon iakokonhsahserón:nis ne Starlyn Oakes.

Sewing by Wabi, Ahkwesáhshne. Kontenaiéhstha ne Amalli Nalli, Honey Mitchell, Tina Thompson, Cheyenne Lazore, Morgan Jock, Krista Loran, Annabelle Mitchell, Shannon Whiteduck tánon Camryn Buckshot, Iakoko'tsión:nis tánon iakokonhsahserón:nis ne Abbi Powless.

Kelly Marshall Designs, Ahkwesáhshne. Rontenaiéhstha ne Jillian Tarbell, Tawny Martin, Billie King, Quota Rourke-Square, Kania Swamp, Alyssa Webster, Steven Thompson-Oakes tánon Eric Mitchell, iakoko'tsión:nis ne Cayla Hinkley tánon iakokonhsahserón:nis ne Krysha Angus.

She Holds the Sky Designs (Karonienhawe Diabo), Kahnawake. Kontenaiéhstha ne Talia Cook, Chatnie Herne, Libbie Tarbell, Krysten Thompson, Stacy Andrews, Kearin Adams, Annabelle Mitchell, Chloe Doctor, Kiannah Thomas, tánon Shannon Whiteduck. Iakoko'tsión:nis ne Stacy Andrews, The Loft, tánon iakokonhsahserón:nis ne Chatnie Herne.

Shyanne Brant, Tyendinaga/Ahkwesáhshne. Kontenaiéhstha ne Wathahonni Mitchell, Tina Thompson, Ivy Ashkewe, Lacy Maracle, tánon Sadie Maracle, iakoko'tsión:nis ne Cecilia Leroux, iakokonhsahserón:nis ne Tanisha Thompson, tánon ionnihkiakstha'tsherón:ni ne Tracey Leaf.

Okwaho Creations, Ahkwesáhshne. rontenaiéhstha ne Ryan King, Hunter Cook, Talon Jacobs, Briana Cook, Adam White, Jolie Gibson, Chloe Doctor, Jake Thompson, Zoe Tatlock tánon Tyler Delormier shakoko'tsión:nis ne Mark Andre Levac tánon iakokonhsahserón:nis ne Arlene Lafrance.

Emma Shenandoah, Ahkwesáhshne. Kontenaiéhstha ne Kania Swamp, Jaida Square, Tina Thompson, Makusa, Destiny Gabriel, Jacy Boots Francis tánon Logan Booth iakokonhsahserón:nis tánon iakoko'tsión:nis ne Jacy Boots Francis.

Mitchell Designs, Ahkwesáhshne. Rontenaiéhstha ne Daisy Lahache, Briana Cook, Zoe Tatlock, Julissa Perez, Ronni Sunday, Ryan King, Eric Mitchell, tánon Autumn Rourke iakoko'tsión:nis ne Aonwentsiio Sunday tánon iakokonhsahserón:nis ne Caiya Sunday.

Niio Perkins Designs, Ahkwesáhshne. Kontenaiéhstha ne Jenna Thompson, Karley Cree, Hayley Cree, Brooke Rice tánon Ivy Ashkewe iakoko'tsión:nis ne Lauren Cree, iakokonhsahserón:nis ne Starlyn Oakes tánon ionnihkiakstha'tsherón:ni ne Margaret Jacobs.

Red Berry Woman (Norma Baker-Flying Horse), MHA Kanakeráhtshera. Kontenaiéhstha ne Summer Tiger Beach, Jaida Square, Savannah Stacey-Francis, Babes Thompson, Daisy Lahache, Kendall Horn, Steevi King, Cheyenne Lazore tánon Danielle Bowles iakotiko'tsión:nis ne Tisha Thompson tánon Steph Ransom tánon iakotikonhsahserón:nis ne Danielle Bowles tánon Vanna White.

Charming Monarch, Ahkwesáhshne. Kontenaiéhstha ne Marina Labaff, Racheal Ghostlaw, Julissa Perez, Bruna Santos, Callian, tánon Aubrey Adams iakoko'tsión:nis ne Brenda Thompson tánon iakokonhsahserón:nis ne Tanisha Thompson.