A Voice from the Eastern Door
A Voice from the Eastern Door
Eddie Gray wa'thawennaté:ni ne Ohén:ton Karihwatéhkwen tsi nikarì:wes ontehnhotón:ko ne Onkwehón:we Awenhnísera.
Onkwehón:we Awenhnísera ontó:kten tonsahatinónniahkwe ne Rotinonhsón:ni raotinónnia tánon Onkwehón:we Othorè:ke Nonkwá:ti Tsi Iaonhwén:tsiaien Tehontstikáhwhas Iontoweienstahkhwa'kó:wa (NNATC) ronterennótha. Wa'é:rahste ne Robin Logan.
Kentsià:ke Ronatehià:ron Iakorihonnién:ni tánon Kanien'kéha Raotinèn:ra ronwa'nikonhrá:wis Robin Logan tánon ontakién:'a Addison Point, 11, wa'thontenonhwará:ton Ohén:ton Karihwatéhkwen tsi nikarì:wes ontehnhotón:ko ne tsi iontoweienstáhkhwa Onkwehón:we Raonenhnísera. Rontoweiénstha wahonwatihón:karon aontahón:ne.
Onkwehón:we Rontoweiénstha wahontená:iehste onkwehonwehnéha atahkwenniáhtshera. Onkwehon:we Awenhnisera. Sehsenekwá:ti, Landon Laffin, Amy Capozzi, Tsiakoseriio David, Sea Gray, Keri Horne-Burns, Ieronhenetha Lazore tánon Devon Oakes.
Victoria Ransom tsieià:ta ne Onkwehón:we ieráhstha wa'eká:raton tánon tsi nahò:ten iakóhston skáthne ne 120 nihá:ti rontoweiénstha. Iéhawe ohiatónhkwa iakoráhston 17 sha'teiakohseriia'kón:ne ahonwatina'tón:hahse tsi ní:ioht tsi ronatoweiénston ne wahón:nise iehonwanatenniehtón:ne tánon tsi na'teiotenonhianíhton ronwatikenhren'seronníhahkwe ne Onkwehón:we tánon ne thiionkwehonwehseraténion kanatakè:ron ronwahsótha thotehotohétston.
Raráhstha Sydney Jacobs ronwatina'tón:ni áhsire, kaieronnitstánion, iakóhshon teiehtharahkwà:ke. Né:'k khó:'k eh nón:we niiehnísa'as.
Rahiá:tons Andy Gardner
Onkwehón:we rontoweiénstha kon'tákie wa'thontáteni tsi nihotirihò:ten ne Kentsià:ke ronatehiá:ron tsi iontoweienstáhkhwa Onkwehón:we Raonenhnísera Awetenta'ón'ke Kenténha 19 shiská:rahkwe.
Ienenhrí:ne ne tsi iontoweienstáhkhwa Kanien'kéha Raotinèn:ra tánon kiako'nikonhrá:wis Robin Logan, wahatirihwahnhotón:ko wahatiwennahnò:ten tánon wa'thatiwennaté:ni ne Ohén:ton Karihwatéhkwen.
Ne Kanien'kéha raotinèn:ra ohén:ton í:iete Mallory Sunday, eh iéshrate Jake Thompson, teieristó:raraks Alexis Terrance tánon ionthwistanónhnha Keely Thompson-Cook.
Eddie Gray ne Ratenonhkwà:tseranonhne wa'thawennaté:ni tánon sahsakaweiahráhkwen tsi niiorihowá:nen ne raotiwén:na "Onkwawén:na iorihowá:nen, onhka iontá:ti, ia'sewatahsónteren" wahèn:ron.
Iahontahsónteren wahontená:iehste ne raonatahkwenniáhtshera, Onkwehón:we ratiráhstha tahontá:ti tánon ne khehiótte ne aionkwawennón:ti wahonwatina'tón:hahse. Sha'tewenhniserí:hen rontoweiénstha tánon iakotirihonnién:ni wahontshó:ri ne kanenhstóhare, kana'tarakenrì:ta tánon ken'niiohontésha kahnekinekénhton, wa'thatirihwáhshnie ne Johnson O'Malley ratíhsere, tánon sahatirihwahnhó:ton ne Rotinonhsón:ni Kanónnia ronwatihonkará:wi ne Onkwehón:we Othorè:ke Nonkwá:ti Tsi Iaonhwén:tsiaien Tehontstikáhwhas Iontoweienstahkhwa'kó:wa (NNATC) ronterennótha.
Tsi nikarì;wes ronatenaiéhston, tóka nón:wa sewatensèn:tsehra nihá:ti rontoweiénstha wahontená:iehste ne raonatahkwenniáhtshera ókia'ke ronónha rotíhson tánon ókiake ne kén:tho ratinakerénion ronatahkwenníson.
Thó:ne ó:nen tekeniiáhsen tekeniráhstha wahonwatina'tón:hahse ne iotirahstánion. Tekeniiáhsen ne tekeniráhstha, Ahkwesahshró:non takiatá:ti, ne wakenithá:rahkwe tsi nahò:ten aonhá:'a tekeniweién:te tánon wakeniká:raton oh ní:ioht tsi wakiatóweienste.
Victoria Ransom wa'ehthá:rahkwe tsi ní:ioht tsi wá:ontste ne aierahstánion ne aiako'nikonhraién:ta'ne tánon aiontoweién:ton tsi nikiohtón:ne, tánon ó:ni sénha aieweientéhta'ne tsi nahò:ten iakotoweienstonhákie. Tsi taiontáhsawen wahonwatina'tón:hahse ohiatónhkwa iakoráhston iakóhshon tsiá:ta iawén:re sha'teiakohseriia'kón:ne, ronwatina'tón:ni iehonwanatenniehtón:ne tsi iontoweienstáhkhwa ratina'tónhkhwa "Spanish School" thí:ken ne ronakiohkowá:nen Ahkwesáhshne rotikstenha'okón:'a iehonwanatenniéhton sha'thonwatikháhshi ne raotihwá:tsire. Ronwahsótha tehotohétston ne Spanish Tsi Iontoweienstáhkhwa.
"Tewakatonhontsió:ni akhena'tón:hahse tsi nithoné:non ne onkonkwe'ta'shón:'a tánon tsi niionkwaia'tawén:'en" wa'ì:ron. Ó:ni wa'ehthá:rahkwe wa'eweientéhta'ne tsi nikiohtón:ne Kanien'kéha karahstánion, tsi ní:ioht ne katshe'tíson tánon kaión:ni akia'tahnháhtshera í:kare tánon kenhnonniánion tánon rotiio'tákie ne ia'tekaiéhston ne karonhià:ke knónhsote. "Kí:ken kaieronniánion, ionkhikaratón:ne kheió:konte." Wahonwatihró:ri ne kanenhráhere tóka nón;wa ne 120 nihá:ti rontoweiénstha tánon iakotirihonnién:ni. "Í:iah tekeráhstha ne thé:nen né:'e tsi í:kehre ióhskats. Keráhstha ne thé:nen né:'e tsi í:kehre oh nahò:tenk akeweientéhta'ne.
Sydney Jacobs, tsi niká:ien ierahstánions ne akó:wen teiehtharahkwà:ke wa'ehthá:rahkwe oh ní:ioht tsi ióntstha ne karahstánion ne tahonwanatenró:seron ne onkwehshón:'a skáthne ne onkwe'tà:ke.
"Sha'oié:ra tsi iakwakaraweiénhen. Eh í:kare ne onkwá:wen DNA" wa'ì:ron. "Na'teiothikióhkwake ionkwenhrá:ron tsi nón:we aká:rake ne aierahstánion."
Wahonwatina'tón:hahse owirahnéha áhsire iakóhshon wá:ontste ne orihwakaionnéha kaieronnitstánon wa'éhsa, né:'e wá:ontste ne akó:wen teiehtharáhkhwa.
"Í:iah nonwén:ton tewakién:tahkwe ne kawennaráhstha" wa'ì:ron.
Logan wa'ì:ron ne awenhnísera wahonténkia'te, takiatén:rohwe ne Onkwehón:we Tsi Nihatiweiennò:ten Awenhnì:ta, ne shihotiio'tákie tsi náhe ne tóhkara niiahia'kserá:ke ontóhetste sha'tontahontáhsawen Seskehkó:wa sahontóweienste.
"Ia'tkaié:ri'ne ne sewenhnì:ta nikarì:wes ionkwanáktote ne aiakwarihwahseronniánion" wa'ì:ron.
Ronte'niéntha khia'teiohserá:ke tahatitenonhá:ton, né:'e khó:k í:iah tha'tahatité:ni ne tsi tehatinonniáhkhwa. Kiótkon teiakwanonniáhkhwa. Kwáh í:ken tsi ionkio'wéskwani taiakwanonniáhkwe" Logan wa'ì:ron. Kwáh shakotina'tón:ni tsi nihotirihò:ten tánon Rotinonhsón:ni ka'nithoné:non.
Reader Comments(0)