Kakaratákie Ne Sá:k-Ne-Iehahserénhas

Rahiá:tons Richard Gast

Tóka nón:wa né:'e ne tsiorì:wa aonhá:'a ioken'tá:'on kaienterítston tsi nikahá:wi Iontkonwarò:roks iorihwakaión:'on kanen'atáhkon onon'onsera'kó:wa kakonhsatákwen kwáh ioiéshon tóka ó:ni watera'ónhtha Kaháhserote-né:'e-ne tekió:karas aokónhsa. Né:'k tsi "Oh nonkié:ren" iotká:te ionkeri'wanontónti, "né:'e ken konwana'tónhkhwa Sá:k-ne-aoháhsera?"

Tsi ní:kon ratirihwaienté:ri í:iah kwáh teió:ken, ne kiokierénhton tewataká:ron rotiié:nen wahatinà:ton enketshén:ri shontakahá:wi ne wísk nieioiénhton wakatoweiénston ne teienerahóntshonte kaia'tonníhsera (Iakón:kwe) ne Cornish oká:ra, ken'nihonná:sa onkwehshón:'a, ne athehsa'shón:'a ne Spriggans, ne Buccas, Bockles tóka ó:ni Knockers (Iehatihnhoháia'ks) tánon ne Piskies. Ne Piskies wa'thonhkwatá:se tehotihwishenhé:ion tehontstikáhwhas ronwanakia'tahtón:ni tánon ienká:ienhte ienhonwatiia'ténhawe tsi nón:we tkanawaién:ton tánon iohontsia'nhétska – skáthne ne otsí oháhsera ratina'tónhkhwa Ignis Fatuus, ne khia'teiorihwará:'on otsiénha. Raotihshenna'shón:'a ne Piskies Will-o-ne-wisp, Joan-ne-Wad tánon Ne Sá:k-o-iehahserénhas.

Ón:wa wenhniserá:te, kwáh é:neken tsi iotenón:tate ne Derbyshine kiohro'shakà:ke onhwentsiakaión:ne teiokerónnion kahserotónnion, ne Longendale ohahsera'shón:'a konwá:ia'ts shé:kon ratika'én:ions. Ionontáhere ó:ni, Iehahserénhas Pike tsi ratiienté:ri, tsi nón:we iokarakaión:'on kakarénhawe thí:ken Peggy-skathne-Iehahserénhas enwá:ton enhontkáhtho akó:wen iehahserénhas onontohará:ke ó:ia teiokierónnion atonhnhéhtshera Meg-o-ne-Iehahserénhas, enwá:ton enhontkáhtho nà:kon nonkwá:ti tsi kaniataratákie Derwent ákta ne Derby. Kénh nón:we niiokwenhrá:ron ká:Ien ne é:so teiohsénhseron-iorihwakaión:'on ronnón:niskwe ne iehahserénhas tsi nikahá:wi niwakenhnhá:wi ne kahihshón:'a, otsi'tsia'shón:'a tánon ohnión:wara teiohkwatasé:ton ne ohahseratokénhti kakwatákwen, teiokierónnion iotahsá:tare tenióia'ke. Teienenrahóntshonte kaia'tonníhsera iehahserénhas tsi konwatiienté:ri, tánon énska shontakahá:wi (tánon, tsi ní:ioht tsi wakaterièn:tare, shé:kon nón:wa) wátston iakonwatí:nonke ne teienerahóntshonte kaia'tonníhsera. Ne Ostoronòn:ke shotiká:raton ne teienenrahóntshonte kaia'tonníhsera iehahserénhas, tsi nón:we ne onerahta'shón:'a ohsò:kwa, káhi tánon otsi'tsia'shón:'a wahatí:ren wa'tewahkwatá:se ne ohahseratokénhti. Kiokierénhton wa'okè:tohte ne 1800's. Kí:ken teienerahóntshonte iehahserénhas thontaiawénhstsi wahatinà:ton Sá:k-o-iehahserénhas. Ontohseróhetste, tsi naho'tèn:shon rotiia'tonnihseronnià:ton sahatira'nentáhshi. Aonaktà:ke né:'e khók ne wahakaratáhkwen onon'onsera'kó:wa tsiotatén:ron.

Ne Ireland nón:we, tsi nón:we ne Sá:k-o-iehahserénhas kiokierénhton, ronnonníhahkwe otsihkwa'kó:wa tánon onekwénhtara nikatsihkò:ten rontstháhkwe né:'e enhatikahrontónnion, iokarakaión:seron wathró:ris kwáh tekió:karas akwé:kon o'karahshnéha ahsonthén:ne tánon ne rohné:ka, wakié:sen ahonákhwen, ronkwe'táksen, rokstén:ha tehshakorihwaieronhá:tons ne rahtahkón:ni, Sá:'k ronwá:ia'ts enhatathá:ra'se tsi iontthnekahráhkhwa otkon'seráksen tethiatera'né:ken. Rothwísto'kte, Sa:'k wahoháhrhahse ne raotonhnhétshera, tóka shí:ken khók ne Otkon'seráksen tahatté:ni ià:ia'k nikahwístake ahá:ton aón:ton énska shé:kon aonsahahnekahní:non. Ne Otkon'seráksen, sótsi tehohsteríhens ahaié:na ne Sá:'k tsi nahò:ten í:rehre, kwáh óksak wa'thatté:ni ohwísta wahatatón:ni óksa'k ne Sa:'k raohna'tahtsherá:kon iaháta, tho ó:ni nón:we ní:wa ne ohwistanó:ron kaiáhsa ne Otkon'seráksen, í:iah teiotón:'on taontahohké:ton waharihwanón:we'ne ahatehrhá:rate oié:ri niiohserá:ke nikarì:wes ohén:ton tsi niió:re wahaié:na ne Sá:'k raotonhnhéhtshera, tonsahatá:ton ne aonsahatatewenniióhake.

Nó:nen ne Otkon'seráksen sahokè:tohte oié:ri niiohserá:ke nikarì:wes tánon wahori'wanón:tonhse ne Sá:'k á:ne, Sá:'k rothahitáhkhe shahthí:ken í:iah é:so tekanonhsó:ton ohahà:ke. Thó:ion ne Sá:'k rohró:ris ne Otkon'seráksen thí:ken, ohén:ton enhatóhetste kí:ken onhwentsià:ke, í:rehre ahaon'wéskwen énska iaká:ienhte sewá:ia sewahió:wane aonsahá:iake tánon wahori'wanón:tonhse ne Otkon'seráksen aharáthen okwirà:ke ákta tsi í:nete tánon iahahianiiontá:ko thí:ken sewahió:wane. Sá:'k wahoié:nawa'se ne Otkon'seráksen waharáthne ne okwirà:ke tánon tsi sénha é:neken waharáthenne Otkon'seráksen, iohshnóre kaiáhsa wahahkaratahkwanión:ko wa'thahkwatá:se ne ó:kwire aorón:ta, sahoié:na á:re ne Otkon'seráksen. Ón:wa, tonsahiatá:ton ne aonsahatatewenniió'ne ne Otkon'seráksen saharihwanón:we'ne í:iah nonwén:ton khiaháhawe ne Sá:'k raotonhnhéhtshera í:iah ó:ni tóka shí:ken ahrénhiie.

Tsi nikarihó:ten nakwé:kon, Sá:'k wahrénhiie. Tánon né:'e tsi tehshakorihwaieronhá:tons tsi nihonó:wen, rahnekákshen, ohwísta aorihwá:ke shako'nikonhrha'tén:nis tánon tehahwístaines, raónha, orihwí:io, onéhshon niahá:re. Né:'k ne Otkon'seráksen thó nahá:iere tsi nahò:ten rorihwanonhwé:'on, kwáh íksa'k sahókta'te ne Sá:'k , í:iah tehoié:nen. Ró:ten ne Sá:'k. Í:iah teiotón:'on ahotaweià:ten ne karonhià:ke tóka ó:ni onéhshon. Khehthahóhtka'we í:iah tewá:tons káneka niá:re né:'k ne enhsáhkete. Roiéshon kwáh iorakaré:ni, ne Otkon'seráksen, ohshwèn:ta wá:thrahkwe iahá:ko ne Onéhshon aotsiénha tánon Sá:'k wahó:ienhte, wá:thrahkwe tánon otsihkwa'kó:wa kakwe'tarónkwen, iaháta ohén:ton íthrakskwe, wahrón:ni ne iehahserénhas, tsi niká:ien aón:ton á:ratste enhahahseró:ten tsi nienhén:re.

Ókia'ke rón:ton thí:ken oháhsera ne Sá:'k raó:wen otsihkwa'kó:wa tánon ohshwèn:ta shé:kon enwá:ton enhsatkáhtho, tsi ní:ioht ne Sá:'k teianitónhsere tsík nón:we ne Onehshónshon, réhsaks. Ká'k nón:we nahen'terón:take ókia'ke rón:ton thí:ken Sá:'k raotonhnhéhtshera enwá:ton ensatkáhto í:we tsi nón:we í:iah é:so tekanonhsó:ton. Sá:'k –né:'e-ne-Iehahserénhas

Irish kanatakonhró:non anenhshón:'a wahatitshá:nike thí:ken otsí tóka nón:wa enthatiiá:ken'ne tsi ratiia'titáron ne tsi ieia'titárion tsi niiontkonwarò:roks ienhshón:newe ohén:ton tsi rati'terón:tahkwe, né:'e thí:ken í:kare ne atonhnhétshera enhonwanaté:kwahte ne í:iah onhwentsià:ke tehón:nes atonhnhéhtshera. Wahonnón:ni ronónha raoná:wen Sá:'k –o-Iehahserénhas, wahatitsihkwatáhko ne otsihkwa'kó:wa tóka ó:ni onekwénhtara nikatsihkò:ten wahatikónhsaren tóka ó:ni wahonhkaratáhko, tánon ohahseratokénhti iahonnéta.

Ne 1845 tsi niió:re ne 1850, tsi niiohserá:ke ne Irish Ohnennà:ta wahontonhkária'ke, sénha é:so ne 70,000 nihá:ti onkwehshón:'a wahatiiá:ken'ne ne Ireland tánon Ohstoronòn:ke nontahón:ne wahónttoke, wentó:re ne aietsihkwatshén:ri, onon'onsera'kó:wa é:so ká:ien. Tánon, onon'onsera'kó:wa sénha kowá:nen tánon wakié:sen aionhkaratáhko, aón:ton aóntston aionià:ton sénha kowá:nen Sá:'k –O-Iehahserénhas shé:kon nón:wa né:'e í:we ronterihwahtenkià:tha, tánon nen Sá:'k –O-Iehahserénhas kwáh tsík nón:we enhsatkáhtho tsi niiontkonwarò:roks nikahá:wi.