OPG Ratinatahré:nas Ronkia'tarohrókstha Wahonwatiié:na "Tontásha ne Watatewenní:io" Tká:ras

Iehiá:tons: Jaclyn Hall

Entákta, Seskehkó:wa 29th ne OPG Ratinatahré:nas Ronkia'tarohrókstha (Tsi Kaná:taien) wahonwatiié:na ne "Tontásha Ne Watatewenní:io" tká:ras Onhwéntsia Rontonhwentsianónhnha wahontená:iehste. Ne Onhwéntsia Rontonhwentsianónhnha Raotikióhkwa ronwatirihonnién:ni ratiksa'okón:'a thí:ken ronónha ó:ni, enwá:ton tenhatité:ni tsi ní:ioht ne raoná:wen tsi nón:we nihón:nes ne onhwentsià:ke. Ne rontoweien'tónhkhwa raotikióhkwa thoti'nikonhrahsa'áhton ahonwatirihónnien ratiksa'okón:'a tánon raotihwá:tsire ne na'teiotikióhkwake ne kontírio, ronwati'nikonhrá:wis ahonterá:ko ne iakakón:tahkwe tsi ní:ioht tsi rontorià:nerons tánon ahonwanatste'niá:ronhse kwahtokén:'en ahonkià:taren ne aontahonwatíhnhe ne katshenen'okón:'a tánon tsi nón:we nihatinákere.

OPG shaià:ta ne Onhwéntsia Rontonhwentsianónhnha tihatihshwanéta'as tánon kí:ken ronwatirihwá:wis ahonterihwahténkia'te ahontáweia'te tehonkerónnions ne onkwe'tà:ke ahonten'nikonhró:ri. Tóhkara niiohserà:ke otóhetste, Onhwéntsia Rontonhwentsianónhnha ia'tehottá:'on ne OPG Ratinatahré:nas Ronkia'tarohrókstha wa'thonkerónnion io'wesen'onwe tánon watatewenhní:io tehonkierónnions ne rotiri'wanontónhskon ratiksa'okón:'a tánon ronwatiio'okón:'a ahonten'nikonhrória'te. Kí:ken iohserá:te, áhsen nia'ká:ienhte tekiattíhen tsi nikahá:wi wa'thontkén:ni 11:00am,12:30pm tánon 2:00pm skáthne ne Carine Nolet tánon Vincent Corbin, tehniiáhsen ne Onhwéntsia Rontonhwentsianónhnha ionkhiienawá:se tsi nón;we nitewanákere. Ronwatiia'tenhá:wi ionkhinatahrenná:wi tsi niká:ien ronwatiienawà:se ronaterò:ron ioianere'ón:we tsi tahonwatí:nerenke tsi nahò:ten teka'nikónhrhare, nakwé:kon; kí:ken iohserá:te rón:ne ne Onhwéntsia Rontonhwentsianónhnha ne Benjamin ne Otsì:nekwar Na'tehahsi'tò:ten A'nó:wara, Daisy ne Tekaia'taierón:ni Anì:tas, Sonic ne Akohsaténhshne

Kwareró:ha tánon Kendall ne iekatsi'ten'sheraié:ri teiakoia'táhkhwa. Akwé:kon ne tehonkierónnions áhsen niwáhsen nikahseriiè:take wahonwatinaktóthahse ia'tekaié:ri tsi nikarì:wes ken'nihonná:sa ahonten'nikonhró:ri ne "Tontásha ne Watatewenní:io" tehontkénies.

Ónhka eh niiakorihò:ten aieweientéhta'ne tóka ó:ni sénha ahonwatirihónnien ne ronwatiio'okón:'a tóka ó:ni ken'nithotiión:sa tsi ronnonhnhékie, enwá:ton enhsetshén:ri sénha orì:wa ne Earthrangers.org.