Tewaten'nikonhró:ri Ahkwesáhshne Tsi Nontaiohtonhákie

Rahiá:tons: Darren Bonaparte

Rotinatahré:nen tsi nón:we ne Ahkwesáhshne Tethotinonniáhkwen wahónttoke iehskaiehstánion kahentà:ke ne A'nowara'kó:wa Tsi Teiontsihkwa'ekstáhkhwa áhsen ní:kon á:se tsi nikiohtón:ne kaieronni'tstánion, ne kiokirénhton ne tékeni iawén:re thí:ken wahonten'nikonhrorià:ne ne tsi nontaiohtonhákie ne Ahkwesáhshne.

Wakatshennón:ni akì:ron tsi kià:tare kí:ken kaio'ténhsera. Wa'kerihwíhsake tánon wa'khiá:ton tsi nikakarò:ten kí:ken kaieronní'tston tánon wa'kihnísa'a. Kheién:'a Jade Thompson teiakotohétston ne ratiráhstha rontoweiénstha ne Roia'tatokénhti Ró:ren Tsi Iontoweienstahkhwa'kó:wa ne Brockville Tkanónhsote, wa'erahstánion wa'a'wé:nehste tsi nón:we nikaieronní'tston

Í:iah thateskiakié:ren ne Tsi Kaná:taien aó:wen tsi nikiohtón:ne kaieronní'tston, tsi niká:ien tekaká:nere tsi kanonhsó:ton tánon tsi nikaieron'tò:ten ne kanáthen aó:wen wenhniseriióhston, ne kiokierénhton áhsen ní:kon kaieronní'tston né:'e ne onkwehshón:'a raotirihwá:ke. Ne áhsen nihá:ti tsionkwe'tátshon ronwatiia'tarákwen ne kiokierénhton kaieronní'tston ne sénha kowá:nen – tsi ní:ioht iónhnhe tsi nikiawén:'en kaia'tonnihseró:ton rotihshenní:io ne aonsahonwanehiahráhkwake.

Ne kiokierénhton ne Iakoia'tatokénhti Káteri Tekahkwí:tha ne Kanien'kehá:ka iakón:kwe ne 17th teiohsénhseronte. Tekahkwí:tha iakonakerá:ton tsi titewen'terón:tahkwe ne Kanién:ke Kaniá:tara tsi na'tekiatenontátere. Wa'kiontóhetste ne kahnhrowá:nen iakota'kerahkwén:ni shiieksá:'a ó:ni tsi wa'ó:teke tsi nón:we ronatená:taien wísk niiohserá:ke ontóhetste. Sha'ontehià:ron wa'onterihwiiohstonhseraté:ni, wa'kieiahshón:te tánon ieia'tarákie ne Kanien'kehá:ka wa'thonná:tahkwe tsi tkanatakè:ron kaniataraktónkie ne Kaniatarowanén:ne. Wa'éhiie, iakohshenní:io, iakoia'tatokénhti tewáhsen kaié:ri sha'teiakohseriiá:kon tánon ken'nikarihwésha ontóhetste taiontáhsawen, wahshakotí:ken tsi nihá:ti shakotiienté:ri, akwé:kon ne ratsihénhstatsi. Kwáh ken' nihá:ti wahonwatiia'takéhnha. Ronakiohkowá:nen né:'e ienhshakonaterennaién:hahse. Arihwawa'konhkó:wa Benedict XVI wahshakoia'tatokenhtíhste waharihwahnírate tsi iakoia'tatokénhti ne 2012.

Tsi karahstánion tsi nón:we nikaieronní'tston ne tewate'nienténhston shakoià:taren ne Jesuit ratsihénhsta tsi shakoientehrhá:'on, Ratsihénhstatsi Claude Chauchetière. Kí:ken karáhston enwá:ton ensatkáhtho ne Ononhsatokenhtì:ke ne Mission of Saint-François-Xavier ne Kahnawà:ke, tsi nón:we kieià:ti.

Ne tekeníhaton kaieronní'tston rontenhnikonhroria'táhkwen ne tsi rónhnhe ne Colonel Louis Cook, ne roién:'a ne Africanró:non raotihnhà:tshera tánon ne Abenaki iakón:kwe. Ronwaié:nen ne O'serón:ni shahonwatírio ne Fort Saratoga ne 1745 tánon wahontewirará:ko ne Kanien'kehá:ka ne Kahnawà:ke. Ken'nithoión:'a raterí:ios, wahaterí:io shahoterí:io ne O'serón:ni tánon Onkwehón:we Tsi Tewaterí:io tahontén:rohwe ne O'serón:ni skáthne ne ronákia'ke tsi thonatená:taien. Nó:nen ne Ohstonhró:non tonsahatirihwa'será:ko wahonterí:io, tewáhsen niiohserá:ke ontóhetste, Cook wa'tehshakorihwáhshnie tsi nihotirì:wake ne Ohstonhró:non shók wahonwarihón:ten karíhton ahá:ton tsi Niiohóntsia Ronthonkária'ks. Wahanén:ri'ne ne Oneio'te'á:ka tánon Tuscarora ronterí:ios tsi nikarì:wes tekarihotáhrhon. Cook wahaterí:io tahontén:rohwe ne 1812, nó:nen tsiá:ta niwáhsen sha'tehohseriiá:kon. Wahonwahsennakará:tate, raia'takwe'ní:io iahakwátho ne Niagara iohontsiatákie, tánon tho iahrénhiie, wahokaré:wahte tsi tewaterí:io. Raónha raohwá:tsire ratinákere ne Ahkwesáhshne ón:wa wenhniseraténion, tekeníhaton aonhá:'a tkahwatsirowá:nen ne Ahkwesáhshne.

Ne Karahstánion ne Colonel Louis ne tewate'nienténhston, rotitshénrion ne Raonhé:ion ne Raia'takwe'ní:io Montgomery ne Tewaterí:io ne Tsiaontarí:kon, kwáh ratiienté:ri karahstánion ne John Trumbull ne Yale Tsi Iontoweienstahkhwa'kó:wa Ratiráhstha Tkanónhsote.

Ne ahsénhaton kaieronní'tston rohshennakaratá:ton shaià:ta ne raohwá:tsire, Captain Bill Cook, ne Rothonkarià:kon Okióhkwa raterí:ios tehá:tens ne Tewaterí:io II. Ken'shithoión:'a, Cook raná:ie ronwaia'tarákwen wa'thatáteni Kanien'kéha tsi nihotirihò:ten ne akenhnhà:ke ne Atirón:taks. Wahshakohshnié:non ne Pacific tánon wa'thatóhetste wahonwarón:tate ne Japanese rarón:tats. Ne shaià:ta raià:tare ne 330 Ahkwesahshró:non wahonwatiié:nawa'se wahonwati'shén:ni ne Axis Kahsatsténhsera ne eh nón:we teka'nikónhrhare. Tho nionsá:re wahathokária'ke tsi nikarì:wes ne Korean Tsi Tewaterí:io, tánon wa'tka'niósken wahrénhiie tsi nikarì:wes shakorihonnién:ni ahontó:ri ne teká:tens. Tón:sen'ne ne teká:tens iahrenhé:ia'te. Tsi raia'tarónnien ne tewate'nienténhston tsi shakoia'takéhnhas raia'tarónnion raohwá:tsire thonahtka'wánion.

Tsi nén:we kaieronní'tston ne tekaká:nerake thiká:te aorihwá:ke ne Ahkwesáhshne tsi nikiawén:'en. Aiá:wens aiakhiià:taren onkwè:tase ratiráhstha ne eniakwáhsa ne karáhston.

Ronakiohkowá:nen onkwehshón:'a ratiià:tare kí:ken taiakwarihwakétsko. Nola Benedict, Kaio'ténhsera Ierihwahserón:nis ne Kanien'kéha Ratitsiénhaiens ne Ahkwesáhshne raoná:wen Kanónhsote ne Onhóntsia Ratirihwahserón:nis, ne thotirihwá:re kwáh shontaiakwatáhsawen. Bruce Boots ne Ahkwesáhshne rarahstánions ne karáhston. Dave Raó:wen Kaniahehsá:'on Kahson'karohá:ron ne tsi Kaná:taien waháhsa ne kaieronni'tstánion kaio'ténhsera tánon wahenhnísa'a ne káhshon onen'takwenhtén:tshera kanawa'ahtó:ton. Ne Kahson'karóhare rotíshon ne iZone Karáhston. Ne UPS tsi tkakóhshre iahontenniehtánion. Dean Point ne Ahkwesáhshne wahrón:ni ne iekaia'taié:ri kanawa'áhtote tekahson'karahronhwánion tánon otstèn:ra ionnià:ton kieientáhkhwa tánon wahakwatá:ko ne káhshon kahson'karoharónnion. Robert Bedard ne Ioianere'ón:we Otstèn:ra ionnià:ton ohson'karà:ke wahotiió'ten ne otstèn:ra wahatikonhsanén:takte. Tewakatonhontsió:ni takherenhsáron ne rotiio'ténion ne A'nowara'kó:wa Tsi Teiontsihkwa'ekstáhkhwa tahónhtka'we ne kaieronní'tston tsi niióhskats tsi nón:we nihatihnió:ten tánon ne Koráhne 150 Onkwaná:ta Aó:wa Tsi Nikaieron'tò:ten Ratíhsere, Secretariat aux affaires (Tehatiristó:raraks tsi nihotirihò:ten) autochtones Aboriginal Tsi Ionkwehonwehseraténion Tho Tahsawáhkhwa Kahwístaien, tanon ne Kanien'kéha Ratitsién:haiens Ne Ahkwesáhshne tsi ní:kon tahonhthwistátkawe tánon tsi ní:kon wa'kionkhihshwanón:na.