Kanien'kehá:ka Raráhstha Garrison Garrow Ronontí:io Koráhne Tsi Thatihwistón:ni Ióhskats Kanónnia Ken'nikahwistá:'a Ka'horókshion

Iehiá:tons: Kaniehtónkie

Garrison Garrow, Kanien'kehá:ka raráhstha tánon rohníson tóhkara ierohrókstha tsi thatihwistonnià:tha ken'nikahwistá:sa'as, wahati'horókshi ka'horókshion nahé:'a "Iohskáts kanónnia" ohén:ton shatehotinonniahkwenhákie shahonataweia'tonhákie ne Kiokierénhton Onkwehshón:'a Kanónhsote 17th Khia'teiohserá:ke Tehontenonniakénnies ne McGill Tsi Iontoweiensthakowáhne, Kiohkià:ke, Tsiaontaní:kon.

Ne Ióhskats Kanónnia ken'nikahwistá:'a tewatoweièn:ton tsi kenhníson teká:neren í:iah khók ne tis niiohsennowá:nen ne ióhskats ne kanónnia, né:k sénha iorihowá:nen, tsi ratiná:ie tánon tsi niionkwarihò:ten tsi nikionkwé:non ne ón:wa wenhniseraténion Onkwehón:we tsi ratinakerénion. Í:non teká:ron enhsatkátho ohsohkwa'shón ne ken'nikahwistá:sa aiokén:ta'ne ne Ióhskats Kanónnia tahatté:ni tsi tehatóhetste ne tehanonniáhkhwa ne raráhstha kwáh ieká:ien tho'nikonhrohsa'áhton tsi rotorià:neron, tsi nenkaié:ren tánon tsi nikionkwé:non, teká:neren ne kwáh ieká:ien tsi enhsáttoke tsi rotorià:neron tánon enhséhrek tho nikawennò:ten tóka shí:ken aweriáhsa teiawenriáhkhwa thók nón:we enhsathón:te'ne tsi nón:we tethotinonniáhkwen. Tsi ní:ioht ne ronakiohkowá:nen ne ióhskats tehatinonniáhkhwa, ia'tehatiiéhstha ronónha raoná:wen tsi nihotirihò:ten wahón:nise skáthne ronaterákwen tsi nikariho'ténhne, ne aorì:wa ne otsi'tén:'a ne kahenta'kehró:non onkwehshón:'a ne Rotinonhsón:ni onkwehón:we rotihníson ne tehanonniáhkhwa raó:wen ateniión:ta. Ne Ióhskats Kanónnia Ponca kanakeráhtshera nikiawé:non ahshén:nen nón:we è:neken nonkwá:ti ne Ohstoronòn:ke tánon ohnà:ken wa'ohshennowáhnha'ne ne watatewenní:io è:neken nonkwá:ti tethontkénnies. Thó ní:ioht tsi rononhtónnion á:se tsi nikanonniò:ten ia'tehotiiéhston tekonttihánion tsi nikanonniò:ten ne è:neken tánon ahsén:nen niió:re è:neken nonkwá:ti kanónnia. Ronnón:kwe ióhskats tehatinonniáhkhwa thó ní:ioht tsi ronwatiienté:ri ahonakia'tahkariióhake tánon ratiweién:te tahonkierónnion ia'tehotiiéhston ronónha ronaterien'tatshenrionhákie tsi nenkanonnienténhake.

Garrow wahèn:ron, "Wentó:re wa'kiakwenhniò:ten aiakwenhnísa'a né:'e tsi ne Ióhskats Kanónnia tánon é:so iohwíhshen ne eh nikanonniò:ten tánon é:so iohsatstenhserá:ien. Wá:kehre enkate'nién:ten tánon enkié:na ohstón:ha thí:ken, tsi nón;we tha'teiotó:te tsi ní:kare. Aiá:wens thó nà:kere."

Mark Miller Kanien'kehá:ka ratá:tis raononkwè:ta ne Kakorahtsherakónhshon ne Ville-Marie-Le Sud-Ouest-Île-des-Sœurs, wa'tharénhsaren ne ken'nikahwistá:'a tsi ní:ioht tsi kenhníson tánon tsi nahò:ten kén:ton. "Kakorahtsherakwé:kon wahatiia'tohtáhrho kí:ken nikaweiennò:ten thí:ken onkwehshón:'a róntstha ratiná:ie ón:wa wenhniseraténion. Tsi nón:we kwáh nikió:kares na'tethatíhas," wahèn:ron Miller. "Onkwakoráhtshera, onkonkwe'ta'shón:'a, thonateróhon nahatí:ien. Ón:wa wenhniserá:te né:'k ne kaieronní'tston – né:'k tsi iorihowá:nen – taiohstarathónhake tsi niióhskats tsi nikariho'ténhne aonsontónhnhete tsi niionkwarihò:ten, onkwawén:na tánon tsi ronnonhnhékie ne onkwehshón:'a."

Shahati'horókshi ne Rotinontí:io Koráhne Tsi Thatihwistonnià:tha Ken'nikahwistá:'a, tsi tethotinonniáhkwen ronterennótha tahontáhsawen wahóntshwa'te kowá:nen tsi nón:we tewa'táhserote kio'nahkwáweron átste, "Wa'thonwatinonhwará:ton ne McGill Iontoweienstahkhwa'kó:wa tsi iokennó:ron," wahèn:ron Louis Arseneault, Tekeníhaton Í:rate Tehatihtháhrha tánon Átste Nonkwá:ti Thonateróhon.

Arseneault iahá:iehste, "Kí:ken kénh nón:we ohwéntsia karì:wes iohshnié:nons tsi nón:we rontkennísa'as tánon tehontatá:wis ne Thiionkwehonwehseraténion onkwehshón:'a... Teiakhinonhwará:tons tsi nihonakióhkwa thiionkwehonwehseraténion onkwehshón:'a tsi niká:ien kénh nón:we tehatihsi'taierón:ni kí:ken iohwentsiatákie ó:nen nón:wa ne onkwehshón:'a onhwentsiakwé:kon ó:nen ronkia'tarohrókstha."

"Ne Rotinontí:io Koráhne Tsi Thatihwistonnià:tha kaná:ie iakohroriánions tsi nikakarí:io ne Koráhne wátstha ne ken'nikahwistá:sa'as tánon iotshennonnia'táhkwen Kiokierénhton Kanakeráhtshera, Othore'kéha Onkwehón:we tánon Tehononkwehonwehtsherakiéhston tsi nihotirihò:ten, karihwanó:ron iahón:newe tsi nahò:ten rón:nehre," wa'ì:ron Jennifer Camelon, Nikarihwésha Ieia'takwe'ní:io tánon CEO ne Rotinontí:io Koráhne Tsi Thatihwistón:ni. "Onkwá:wen iohskaténion wahsóhon ken'nikahwistá:'a ronaten'nikonhrorià:ton ne iohskatsténion karáhston ne Ióhskats Kanónnia ó:ia wahonate'shennaién:ta'ne ne Thiionkwehonwehseraténion ratiráhstha teiohontsiià:kon ne Koráhne tahontáteni tsi nahò:ten ionia'ténion, tsi nihatiweiennò:ten tánon tsi nihotirihò;ten."

Ne Ióhskats Kanónnia ken'nikahwistá:'a kakónhsare ienká:ko ne $30 ne 50 millimeters tsi na'tewatakà:ron tánon ierohrókstha tsi káhshon, skáthne tsi thatihwistonnia'táhkhwa thók ní:kon ká:ien ne 3,500. Né:'e énska ká:ien ne tóhka ne ken'nikahwistá:'a ronahtká:wen ne tsi thatihwistón:ni tsi ontahseróhetste ahonwatihshennakará:tate Kiokierénhton Kanakerahtsherakè:ron, Tehononkwehonwehtsherakiéhston tánon Othore'kehró:non.

Í:iah ne té:ken ne kiokierénhton ken'nikahwistá:'a tehohníson ne Garrow. Ó:ni rohníson ionnihkiá'kstha ronwá:wi ne Arihwawa'konhkó:wa Benedict XVI ne Rome, Italy tsi nikahá:wi wahshakotiia'tatokénhtiste ne Káteri Tekahkwí:tha ne 2012. Nó:nen Garrison waharihwanòn:we'ne ahoió'ten kí:ken kaio'ténhsera, tehotonhontsioníhne ahshakoià:taren ne Káteri thiká:te naieia'to'ténhake. Í:iah tehshakoià:taren taiakotenon'waráhnhen. Ronakiohkowá:nen eh ní:ioht tsi shakotiia'taráhston, í:iah ó:ni ne óhna thaiakokia'tawì:ton Akokiá'tawi'tsherà:ke, wahá:rahste tekaieronniánion tsi teiakothnia'sáhere wa'okén:ta'ne ne Karonhià:ke Iononhsakwà:ronte tánon Teioháhahke Kahshwénhtha. Nà:kon tsi teiakothnia'sáhere akoia'karà:ke wahawé:nehste tsi iakoia'tatokénhti wahá:rahste ne karénhsa. Wahé:nehste tsi niiakonkwe'tí:io wa'kiontkà:neren ohén:ton nonkwá:ti í:iah ne té:ken iakothon'kwáweron tsi ní:ioht ne ronákia'ke tsi shakotiia'taráhston. Oh nà:ken nonkwá:ti ne ionnihkiá'kstha karáhston ako'tá:ra (iakoniáhton) skáthne í:kare ne óhonte niwahsohkò:ten ohnión:wara iohnio'onhákie è:neken nonkwá:ti teskiakié:ren tsi niwahtkahtho'tsherò:ten ne tsionerahtase'kó:wa.

Garrow's raráhstha ó:ni róntstha ne Koráhne Tewa'á:raton Raotikióhkwa, róntstha ne rorahstánion "Wes Patterson Tsi Thoió'te" wahonwatihshennakará:tate ne tewa'á:raton rontshwá:tha.