Sewenhnísera Entewatatenhní:seron Ne Kon'tákie Skén:nen Entewanonhtónnion

Iehiá:tons: Kaniehtonkie

Kirby Kawarawana Jock, Ratia'takwe'ní:io tánon Skáthne Rotitshénrion ne Iewatahshón:tere ne Skén:nen Raotikióhkwa, Ahkwesáhshne rotehià:ron tánon sha'tehón:ne ne ronakiohkowá:nen ken'nithothiión:sa ronón:kwe kén:tho ratinakerénion – ronwarihonnienníhahkwe ne kaianera'kó:wa tánon tsi nikaianerenhserò:ten ne "skén:nen." Shontahotehiahrónkie tsi niió:re iahatehià:ron, wahate'nién:ten aho'nikonhraién:ta'ne tánon aháhsere tsi nikaienarenhserò:ten, tetsiá:ron ne Kaianere'kó:wa tánon skén:nen. Tóhkara niiohserá:ke ontóhetste shihohsa'onhákie ne raohiatónhsera (master's degree) ráhsere ne tsi iontoweienstahkhwakowáhne ne Washington ne Kawarawana sénha é:so wahatóweienste ne Kaianere'kó:wa. Énska ne kwáh entá:on'k wahatóweienste taharihwákha tánon aharihwahseronniánion – tsiorì:wa ne wahatóweienste kwáh né:'e karihwatákie ne skén:nen tánon aonsahserihwahseronniánion ne tsi nón:we teka'nikónhrhare. Tho nón:we kwáh óksak waharihwíhsake ne ahaweientéhta'ne oh ní:ioht tsi taharihwákha tánon wahatóweienste ne ahshakorihónnien oh nakaié:ren ne "taierihwákha" tánon sha'tehoti'nikonrò:ten onkwehshón:'a, waharihwahserón:ni ne Ohén:ton Ahonni'tskotónnion tánon skáthne "wahontenenhrón:ni" ne í:iah thatihwístako akanenhraién:take aontahatirihwá:reke tánon ahatirihwahserón:ni tsi teka'nikónhrhare – ne Iewatahsón:terake Ne Skén:nen kenkiokonnià:ton.

Tsi nahò:ten ranonhtónnion ne Kawarawana, tsi iaharihwá:reke ne skén:nen tho nonkwá:ti na'kaié:ra'te wa'thontká:neren ne ahontóweienste. Wahèn:ron, "sha'teiokiatoweiénhston teharihwákhas tahakwatenniéhten kaká:rare ne Leon Shenandoah rohiá:tonne UN 1980's niiohserahsé:ta'as shikahá:wi. Tsi nahò:ten rohiá:ton, taharihwakétsko thí:ken ne onhwentsiakwé:kon ratinakerénion ahonnonhtonnión:ko 'sewenhnísera aetewatatenhníseron ne kwáh tsi skén:nen aón:ton, tetwá:ta'as tsi ronron'táthons, tánon tetewá:ta'as tsi nón:we na'teka'nikónhrhare tsi ronatonkwe'taksá:kon.'"

Ontóhetste tsi ne ratiri'wanóntha é:so iohserá:ke nikarì:wes, ne ronakiohkowá:nen, ne 2001 ietsiarónhkwen nonkwá:ti tsi kanistatákie "Awenhnísera Ne Skén:nen" wahontenhniserará:ton kwáh tsi nikanèn:ra wahatirihwanòn:we'ne onhwentsiakwé:kon tsi nón:we ne UN thatinontsístaien (Seskehkó:wa 21st).

Iahá:iehste, "tsi iaharihwá:reke ne skén:nen aón:ton ne onkwénhtsia, ne Iewatahsón:terake Ne Skén:nen Raotikióhkwa iehatiién:teres tsi niiorihowá:nen ahatikwé:ni ne sewenhnísera ne kwáh tsi niiohóntsia skén:nen aón:ton, rotirihwanonhwé:'on akwé:kon ne kakorahtsherakè:ron. Ne:'k tsi entá:on'k ó:ni enhoti'nikonhraién:ta'ne thí:ken Onkwehón:we Kanakeráhtshera í:iah tethotirì:waien ne UN. É:so iohserá:ke ontóhetste ne skén:nen akaio'tén:'en tsi ratinakerénion ne í:iah tehononkwehón:we, wakanonhtonnión:ko oh ní:ioht aonkianeráhsten aontakatáhsawen kí:ken kaio'ténhsera tsi nón:we ne Onkwehón:we ratinakerénion. Ia'tewakerihwaién:ta'se taontakahtén:ti tánon akherihwahéhrhahse akwé:kon ne Kakoráhtshera ne Ahkwesáhshne ahatiién:tere'ne ne khia'teiohserá:ke Awenhnísera ne Skén:nen, ne aetewatáthawi tánon aetewatatshén:naren ne aoianerénhsera ne skén:nen aiethirihwakwénienhste ne ionkhihsothokon'kénha tánon ne tsi nén:we tahatikonhsotákie."

Akwé:kon ne kakorahtsherakè:ron ronwatihshennakaratá:ton ne Ahkwesáhshne ó:nen tehotirihohétston ne aorihwá:ke.

Kanonwarà:ke ne Kakónhsare Aohiatónhsera iora'wístonte, (Facebook page): @kanienkehaka.skennen.

Ne onhwentsiakwé:kon Awenhnísera Ne Skén:nen Karihwaseronniháhkwe ne 1981 ne UN Akwé:kon Ronakia'tarohrón:ne, kwáh tsi nikanèn:ra wa'thonnikiohkwakén:ni ahatirá:ko ne awenhnísera ne tóhsa tahontate'nikonhrahá:ien tánon tahatí:tahste tsi tehontateron'táthons. Ne UN ronwatihonkará:wis akwé:kon ne Kanakerahtsherakè:ron tánon onkwehshón:'a ahatirihwakwénienhste takatáhston ne tsi tehontaterihwanòn:we tsi niwenhníseres, tánon thiká:ti ne awenhnísera ahontatenhníseron ne ahontóweienste tánon onkwe'tà:ke tahonwatirihwathè:ten tsi nikarihò:ten kionateróhon ne skén:nen.

Ne Awenhnísera Ne Skén:nen ieniorihón:ti ne "Sewenhnísera Skén:nen Enhonkia'tarò:roke" skáthne ne ronwatiia'tarákwen ne Kanien'kéha Rotiianéhshon, Iotiianéhshon tánon Kaié:ri Niiorì:wake Ronaterihón:ton, ne Roia'tatokénhti Regis Kanien'kéha Onkwehón:we tánon Kanien'kéha Ratitsiénhaiens ne Ahkwesáhshne enhonné:sheke. Ne énska entewatatenhniserákwen "tsi nón:we akwé:kon ne Kanien'kehá:ka enwá:ton skáthne tentewá:ta'ne sewenhnísera, enionkwa'nikonhriióhake skén:nen entewanonhtonniónhwe, eniethirihwakwénienhste ne ionkhihsothokon'kénha tánon tsi niká:ien enthatikonhsotákie."

Tsi nahò:ten ranonhtónnion ne Jock, ne Awenhnísera Ne Skén:nen Enhonkia'tarò:roke entewatáhsawen enhatirihwahnhotón:ko ne kiohton niiohwistá:'e ohrhon'kè:ne, skáthne ne ohrhon'kè:ne enwaterihwahtén:ti tenhonwatirénhsaron ne kanakerahtsherakè:ron ronatohétston, tánon tenhatihtharónnion tsi nahò:ten ratirihwaienté:ri tánon ka'nikonhrí:io tsi ní:ioht ne skén:nen kénhne tánon wa'tewaré:ni tsi ratinakerénion ne wahón:nise. Iotohétston nonkwá:ti enwaterihwahtén:ti tenhonwatirénhsaron ne enkanakerahtsheraién:take tsi nén:we, tánon tenhatihtharónnion tsi nahò:ten ratirihwaienté:ri ne ka'nikonhrí:io tsi ní:ioht ne skén:nen akénhake aón:ton taonné:ni tsi tewanákere ne Kanien'kehá:ka tsi kanakerahtsherakè:ron ne tsi nén:we.

Akwé:kon ne Kanien'kehá:ka ietshihonkará:wis ne 2018 Awenhnísera ne Skén:nen Ronkia'tarohrókhe ne Tsionkwanatí:io ne Ahkwesáhshne Seskehkó:wa 21, 2018.