Kiokierénhton Ahkwesáhshne Ratiráhstha & Ratiiénthos Rontkè:rons Wahontatón:ni ne Kanakerahtsherakè:ron Tsi Ionten'nikonhroria'táhkhwa

Iehiá:tons: Jaclyn Hall

Ne kiokierénhton watákie ne Ratiráhstha Tánon Ratiiénthos Rontkè:rons wahontatón:ni ne Kanakerahtsherakè:ron Tsi Ionten'nikonhroria'táhkhwa. Ne Rontkè:rons wahontekhwahra'tsheró:ton Okaristiiáhne, Seskéha 30th 3pm tsi niió:re ne 8 pm o'karahshnéha. Latoya Rourke iakonenhroníhne wa'ì:ron, "wa'akhiri'wanón:tonhse ne kenkiohkwà:ke, kahiatonhserà:ke wahatihiá:ton, kátke ronnéhre aonsahotiién:ta'ne ne Ratiráhstha Tánon Ratiiénthos Rontkè:rons ne Ahkwesáhshne. Ia'kionkwarihwaién:ta'se Okaristiiáhne tánon iákwehre ne ó:ia entsiakwaterihwahténkia'te ne óhente ionáktane ákta ne iokaión:'on Tekahson'karó:rens Kaniá:to. Ionkwarì:waien aiakión:ni aiakhinaktóthahse ne Ratiráhstha Ionten'nikonhroria'táhkhwa, tánon ne eh nón:we niiokwèn:rare ne ratiráhstha ahonwatinaktóthahse akaia'tá:rake ne iokaión:'on kaniá:to kanónhsote."

Iehatiia'taié:ri ne tékeni iawén:re nihá:ti ne rontkè:rons wahatirihwanón:we'ne ahonkià:taren ne Kiokierénhton Ratiráhstha & Ratiiénthos Rontkè:rons. Tsieià:ta ne iontkè:rons, Aliyah Thompson, wa'ì:ron, "Ohna'kénhkha ia'kionkwarihwaién:ta'se aiakwakià:taren ne Tsi Thontkè:rons, kwashón:te ki' ná:'a. Ahsontakwé:kon ionkwaié:'on iakwatena'tarontónnions tánon iakwatateweiennén:ta'as ne Tsi Thontkè:rons." Latoya wa'ì:ron, "kénh ratinákere ratiiénthos, kahehtà:ke rotiió'tens, ratiráhstha, nia'té:kon konnonniánions tánon ronaterihwahtenkià:ton wahonwatihonkarawíhon ahonkià:taren ne Rontkè:rons."

Akwé:kon wahontkè:ron tsi nahò:ten kén:tho káhson tánon kén:tho kaiénthon. Ne Rontkè:rons ó:ni eh nikahá:wi onterihwahtén:ti ohna'kénhkha wenhniseratákie ne wahonterennotónnion ne Tsi Ionten'nikonhroria'táhkhwa Watákie ne Tsi Kanakerahtsherakè:ron Tsi Ionten'nikonhroria'táhkhwa, wahonwatiríhon ratihní:nons ahonterennatahónhsatate. Tóka í:iah tesate'sennaientá:'on aontesé:non tánon aontesatken'sé:ron ne Ratiráhstha Tanon Ratiiénthos Tsi Thontehrontakwáhtha, ne ó:ia enhshontkè:ron enhshotiién:ta'ne shatirihwahseronniánions, Okaristiiáhne, Seskehkó:wa 6th, 13th tánon 27th ne 3 pm tsi niió:re ne 8 pm o'karahshnéha. Tsi nón:we enhonterihwahténkia'te ne Rontkehrontákwas shatirihwahseronniánions, á:ienhrek tóka nón:wa Tsi Kanakerahtsherakè:ron Ionten'nikonhroria'táhkhwa tóka ó:ni ne Ratiráhstha Tsi Ionten'nikonhroria'táhkhwa (óhonte ionáktote ákta ne iokaión:'on Tekahson'karó:rens Kaniá:ton).