A Voice from the Eastern Door
A Voice from the Eastern Door
Tsi niká:ien rotíshon ne teiohstaráthe tánon iohskatsténion tekenhnakhánion skáthne ne Kaia'tahén:te kón:nete (L to R) Konwanahkotha Sargent, Lori Lazore, Iakonikonriiosta Bonaparte, Kaiatahente, Iawentas Nanticoke, Deana General, Kanerahtens Skidders, tánon Allie Herne (í:iah teieià:tare)
Little River Mohawks (Ken'nikania'tará:'a Kanien'kehá:ka) ronnaterennó:tahkwe ne Ahkwesáhshne Rontatewenní:io Tsi Iontoweienstáhkhwa Khia'teiohserá:ke Ratikhwahéhrha tánon Tekenhnakhánion Tethotihenréhta.
Joshua Sergeant tharihowanáhtha ne iohskatsténion tekenhnahkhánion.
Ronakiohkowá:nen wahatinó:ronhkwe ne takò:s kaià:tare tekenhnakhánion tánon tsi ní:ioht tsi iotakiehshón:ton.
Ne oharennáhtha otsistóhkwa tekenhnakhánion né:'e aonhá:'a ióhskats ionthrákhwa tekenhnakhánion tsi ní:kon kiohren'tónnion.
Tsieià:ta iakón:kwe wa'akotera'shwí:iohste wa'ontkwé:ni ióhskats Aionwá:tha Akia'tahnháhtshera ronakiohkowá:nen rotíshon.
Kí:ken tekenhnakhánion onhwentsiakwé:kon nithoné:non ne onkwehshón:'a rotíshon wa'thonwatirihwáhshnie ne Ahkwesáhshne Rontatewenní:io Tsi Iontoweienstáhkhwa. Ne tekenhnakhánion konwahsenná:wi "Ionkhi'nisténha kwanorónkhwa."
Iehiá:tons Jaclyn Hall
Ne Ahkwesáhshne Rontatewenní:io Tsi Iontoweienstáhkhwa Raoná:wen Khia'teiohserà:ke Wahsiríson Tekenhnakhánion Tethontihenréhtha Aontatokenhtì:ke, Seskéha 19 onterihwahtén:ti. Kí:ken iohseratákie tsi ní:kon enhatihwístako ne énhontste ne enhonhténkia'te ne Ahkwesáhshne Rontatewenní:io Tsi Iontoweienstáhkhwa tánon enhonthwístaien ne katkekshón:'a asé'stsi enhatinonhsakétsko ne tsi iontoweienstáhkhwa. $10 million nikahwístake ia'tehonóien ahatihwístako ahatíhsa ne kanonhsasé'stsi. Ne kanonhsasé'stsi tsi iontoweienstáhkhwa Satsherá:ti wa'ohatákie nón:we enhontenonhsón:ni, oh nà:ken ne Ahkwesáhshne Rontatewenní:io Tsi Iontoweienstáhkhwa raoná:wen Tsi Thonteweien'tónhkhwa tánon Tkahéhtaien. Kwáh ieká:ien tsi nonkanonhso'ténhakie rorahstánion ne tsi niká:ien enhatenonhsón:ni iohren'tónnion ohwhakónhshon tsi nón:we ne ón:wa tkanónhsote. Ne rotihsirisa'ánion tethotihenréhtha né:'e ne oh na'kénhkha onterihwatén:ti ne tsi nonkiahiakseró:kten. Ontó:kten ne Ahkwesáhshne Rontatewenní:io Tsi Iontoweienstáhkhwa Raoná:wen Khia'teiohserá:ke Ratikhwahéhrha, Wa'thotóhetste Wa'thoré:ron tánon Wahsiríson Tehotihenréhtha.
Rontkè:rons ronatekhwahra'tsherò:ten ne AFS kon'takiéhshon nia'té:kon ronatkè:ron tsi nahò:ten rotihsa'ánion tánon kakhwahshón:'a. Thó:ha akwé:kon ne kákhwa AFS wahatiié:na. Ne Ronahsiríson Tethotihenréhtha énska niiohwistá:'e iotohétston nénkie tontáhsawen, ne ratihninòn:re tehotisteríhens ne aontahatihsirihá:ren. Joshua Sergeant né:'e thathró:ri/ tharihowanáhtha tehshako'nikonhrawén:rie tsi niió:re ne ó:ia tenthatihsirihá:ren. Ne Ronahsiríson Tethotihenréhtha iahontahsónteren tsi niió:re ne 5 pm iotohétston nénkie.
Kanónhskon nonkwá:ti ne tsi iontoweienstáhkhwa ó:ni tethotihenréhtha ne Kanien'kéha aorihwá:ke. Akwé:kon ahonate'shennaién:ta'ne oh nahò:ten ne kwáh ioiánere ahontkwé:kon tóka shí:ken í:iah tehonate'shennaientá:'on tahotihenréhton ne áhsire aorihwá:ke. Tsieià:ta ne iakón:kwe iakotste'niá:ron wahshakotiháhrhahse iehsén:nare, kwáh akaónha akó:wen. Tsieià:ta ne iohsirón:ni Sheree Bonaparte, wa'ì:ron "ia'konkwarihwaién:ta'se teiohshwáthe aiakwahsirón:ni tánon aonhsohkwiióhake né:'e tsi kwáh tho niieia'tò:ten kí:ken iakón:kwe. É:so ronwatiienawá:se ne kenkiohkwà:ke." Shahonwati'nikonhraientáhten tsi niwahsohkò:ten tánon tsi nikaieron'tò:ten karónnion ne ahsirà:ke tekenhnakhánion, Kaia'tahén:te Maxine Cole, í:iah tekiakoterièn:tare né:'e wahshakotiháhrhahse wa'tehshakotirénhsaron, tahshakoti:nonke aieié:na akó:wen ióhskats ne tekenhnakhánion.
Wenhniseriióhne, wahonenhniseriióhsten kon'tákie tsi nikarì:wes wahonterihwahténkia'te akwé:kon ón:ton wahonten'nikonhró:ri átste nonkwá:ti, tehontatenatahrenná:wi, ronatkehrontakwenhákie tánon tehatirihwáhshnie tsi niiorihowá:nen tsi nahò:ten rotirì:waien
Nia'teiorì:wake onterihwahtén:ti ne tahatihshwanéta ne Ahkwesáhshne Rontatewenní:io Tsi Iontoweienstáhkhwa raoná:wen ronathwistonniá:ton, tóka shí:ken wahsena'tarahní:non ne kana'tarohkhón:we tánon kiohnhonhskwá:ron o'wà:ron rotirihtón:ne, tahtsi'nehtará:ron iekaia'taié:ri, kakhwahshón:'a tánon ne tekenhnakhánion, Kanien'kéha tethotihenréhtha tíkits tóka ó:ni né:'k ne wahsehwíston. Ronakiohkowá:nen iahotike'tohtánon tsi nahò:ten thonaterihwahtenkià:ton, tánon ne tekenhnakhánion, é:so wa'kahwístako. Né:'k tsi akwé:kon tsi nihá:ti rón:neskwe wahonkia'tarónnion tsi nahò:ten onterihwahtén:ti, ne Ahkwesáhshne Rontatewenní:io Tsi Iontoweienstáhkhwa ákta wahonnehtonhákie ne ahontenonhsón:ni ne ronónha raoná:wen kanonhsasé'stsi tsi iontoweienstáhkhwa.
Reader Comments(0)