A Voice from the Eastern Door
A Voice from the Eastern Door
Jennifer Kreisberg wa'onterennó:ten tha'ehnahkwá:'eke.
Ienonniawéienhen Feryn King teiothwe'nón:ni kanà:kara wa'kienónniahkwe.
Ne Crosswinds Raotinèn:ra oh na'kénhkhwa wahonterennó:ten iahonnenhniseró:kten wahonterennotónnion ne iononniahshnó:re (Rock tánon Roll)
Ratiksa'okón:'a wahontewístohte tethonthenwénhtha tsi tkahné:ko.
Mona's Iekhón:nis kahnhotónkwen tánon iakotshennón:ni aiesakwatákwen tsi nahò:ten tesatonhontsió:ni (Ia'satenwennáta 315-296-2840). (L to R) Tisha Shenandoah, Ramona Shenandoah tánon Jerome Shenandoah.
Feryn King wahonwati'nikonhró:ri tsi nikarì:wes wa'kienónniahkwe.
Ne Onkwehón:we Othorè:ke Nonkwá:ti Tsi Iaonhwén:tsiaien Tehontstikáhwhas Iontoweienstahkhwa'kó:wa (NNATC) wahonterihwahténkia'te ne raoná:wen khia'teiohserá:ke Ahkwesáhshne Atenró:sera Awenhnísera kí:ken Awentatokenhtì:ke, Seskéha 12th. Ne onterihwahtén:ti ne aonhá:'a iorihowá:nen ronterihwahtenkià:tha ne Tehontstikáhwhas Tsi Iontoweienstahkhwa'kó:wa, skáthne kwáh ken'nihonakióhkwa ne kén:tho ratinakerénion ratiráhtha tánon ronatekhwahra'tsheró:ton ronatenaiéhston tsi nahò:ten ratiweién:te. 11:00 am ohrhon'kè:ne tontáhsawen, skáthne ne ronterennótha tánon ne ronatké:ron. Nia'té:kon ioterihwahténkion ne akwé:kon ne onkwehshón:'a ahonkià:taren tsi ní:ioht ne wahatitsihkwá:ron, aón:ton ne tewá:ia tahsatén:tsha, ne Tsis wahonwatinenhratákwen tánon ne tahsani'tsionhkwahkwánion kanónhsote. Ne Tsiá:ta Nihá:ti Tehatinonniáhkwa Raotikióhkwa, Iakwa'sátste Ken'nithotiión:sa Ronata'kariióhston tánon Ahkwesáhshne Kaksà:ta tánon Kahwá:tsire Kaia'takehnháhtshera wa'thonwati'nikonhrawénrie ne ratiksa'okón:'a wenhniserakwé:kon.
Ronterennótha Ahkwesáhshne ratinákere tánon thihatiià:tate kiokierénhton kanakerahtsherakè:ron kenkiohkwà:ke iahatiráthen tsi tkahson'kará:ien wa'thonkerónnion wahonwati'nikonhró:ri wenhniserakwé:kon. Kon'tákie kwáh tsi niió:re iahontó:'kten, ó:nenk tsi ónhkak ierén:note tóka ó:ni tehotinonniáhkwen . Tsi nihá:ti ne ronterennótha wahatinenhrahserón:ni kí:ken iohseratákie Ahkwesáhshne.
Atenró:sera Awenhnísera ne Jennifer Kreisberg, Kiawentí:io tánon Rasentónkwa, Quese IMC, Kwatharáni Jacobs, Crosswinds Band tánon ne NNATC Tehontstikáwhas Raotinèn:ra. Tkà:niote ó:ni ne mic ne ónhka iontatshináhstha eh taontaié:ta'ne aontená:iehste tsi nahò:ten ieweién:te. Shaià:ta ne Ahkwesáhshne aonhá:'a kienonnaweiénhen, Feryn King, karì:wes tho tontaienonniáhkwe wahonwatina'tón:hahse akwé:kon tsi niiakoterien'tahtsherià:kskon.
Akwé:kon kahonkará:wi ne aontahón:ni tánon ahonte'nikonhró:ri tsi niioiánere tsi nahò:ten ní:'i kionkwehtáhkwen ne Ahkwesáhshne. Ahonthonweia'tà:na ó:ni kaién:tahkwe ne onkwehshón:'a énkie nonkwá:ti nithonenóhseron ne Ahkwesáhshne. Kwáh í:iah thé:nen tethonatekhoktá:ni ne khó:'k wa'thotirihwá:ra'se ne ia'tahotirihwaién:ta'se oh nahò:ten ónhte ahón:neke. Ne Onkwehón:we Othorè:ke Nonkwá:ti Tsi Iaonhwén:tsiaien Tehontstikáhwhas Iontoweienstahkhwa'kó:wa (NNATC) kwáh é:so tsi ióhskats tsi ní:ioht tsi wahotiió'ten. Rotiio'tenhserí:io, tsi ní:ioht tsi wahonhténkia'te ne khia'teiohserá:ke Ahkwesáhshne Atenró:sera Awenhnísera. Ahkwesáhshne Kenkiohkwà:ke Aniahesáhtshera (Trust) wa'honwatiniáhese né:'e wahonwatihwíston tsi wahonterihwahténkia'te.
Reader Comments(0)