Ne Ahkwesáhshne Tsi Niionkwarihò:ten Ronkia'tarohrókstha Rontoweiénstha Sahon'therísa

Ne Ahkwesáhshne Tsi Niionkwarihò:ten Ronkia'tarohrókstha nahé:'a sahatíhsa wahon'therísa Denise Jock ronwatirihonniénhahkwe. Ohiarí:ha tewáhsen wísk shiská:rahkwe ne oh na'kénhkha sahontóweienste. Né:'e ne oh na'kénhkha wahontóweienste akwé:kon tahatikhwénhawe, skáthne wa'thón:tonte tánon wahonwatina'tonnión:nahase tsi nihona'therò:tens wahatíhsa. Kwáh ken'nihotikióhkwa ákte na'tehón:ne ókia'ke ià:ia'k niwa'thé:rake wahon'therísa tsi nikarì:wes rontóweienstha. Tsionkwè:ta, Sally Martin, wa'ì:ron "1994 Ahkwesáhshne sakákien, kénh nihtkéhtha kí:ken kanónhsote tsi iorihwakaión:seron kakè:ron akeweientéhta'ne nakata'therón:ni kén:tho ronwatirihonnién:ni."

Ronatera'shwiióhston ne rontóweienstha ieweién:te tsi niká:ien wa'onkhirihónnien akwé:kon ne ron'theraweientehténion orì:wase wahatiweientéhta'ne. Ókia'ke ne rontóweienste ón:ton wahonta'theratkè:ron, tsi niká:ien wahon'therísa tsi nikarì:wes wahontóweienste, thihatiiatate né:'e ne' wahatirá:ko ahonterá:ko tóka ó:ni ónhkak ahonwatí:ion. Tsiorì:wa iorihwí:io Ahkwesahshró:non shé:kon ronnonkwe'taká:te ne kwáh í:ken tsi rontehraweientehténion ne onkonhonwé:ne.

Sue Ellen Herne, Orihwakaión:seron Tsi Nón:we Nikakè:ron Tsi Nahò:ten Ratíhsere Ohén:ton Í:iete, Ierihwahserón:nis, wa'ì:ron, "ón:ton wahonwatirihónnien ahonta'therón:ni wahatihwistaié:na Kanón:no Nón:we Rati'tskó:ton Né:'e Ronaterihwahtenkià:ton né:'e thonthwistatká:was Ne Ahkwesáhshne Tsi Niionkwarihò:ten Ronkia'tarohrókstha ne aontónhsheke ahonwatirihónnien tsi kanenhstá:ton, onkwaná:ta. Ohserakwé:kon enwá:ton enhsatówienste tekonttihánion, ó:ia ó:ni shonterihwahseronniánions ne aonsahonwatirihónnien. Né:'e ne ó:ia tenthontáhsawen kahiatonhserà:ke tekonrénies Indian Time enhatihiá:ton. tenhonterihwarénia'te.