Tammy Bonaparte ~ Ieráhstha Tsi Ní:kon Iakoio'tén:'en

Iehiá:tons: Mahlon Smoke

Tóka shí:ken Kaná:takon nieiothahí:non satorihákie tánon iénhsewe ne kaié:ri na'tekahióhsaien ne tsi iotoweienstáhkhwa iohatákie tóka nón:wa enhsáttoke ókia'ke konnón:kwe ó:iente ionnià:ton ionátston teiohstaráthe kakontsheráhrhon ionateweiáhere tánon kahentà:ke ioiánere ká:ien ohén:ton tsi iakonónhsote ne shakotinorónhkhwa Tammy Bonaparte.

Iakón:kwe iaka'onwéskwani aiekontsheráhrho shahontehiahrónnion ne ronwatiio'okón:'a tánon wahonthwatsirón:ni. Bonaparte aontaiethiiate'nién:tenhste ónhka í:iah teietshá:nis ne othé:nen á:se aionte'nièn:ten tánon iakohretshiá:rons akwé:kon ne sha'tethotí:ions eh nahatí:iere. Bonaparte, wísk niwáhsen sha'teiakohseriiá:kon sontaiontáhsawen wa'ekontsheráhrho, sha'ónttoke í:iah othé:nen teionkiéhrha né:'e tsi ó:nen akwékon ronatehiahrónnion ne ronwatiio'okón:'a tánon ó:nen rotiiakén:'en tsi iakonónhsote. Wa'erihwatshén:ri tsi nahò:ten ieweién:te tánon taiontáhsawen wa'ekontsheráhrho wa'onterien'tatshén:ri. tsi nón:wa ní:ioht ne akohwá:tsire tánon tsi nón:we niiè:teron.

Nahé:'a wa'etshén:ri tsi nahò:ten kwáh iaka'onwéskwani wa'onterien'tatshén:ri tánon wa'ekontsherahrhóhseron ionthentahseronnia'táhkhwa tóka ó:ni akaónha iena'tónhkhwa "akaónha akonnón:kwe." Né:'e kí:ken tsík nahò:ten tontáhsawen akaónhk akoten'nikon:ra, kakontsheráhrho wahkaratáhkwen ó:iente konnón:kwe nikontiieron'to:ten ionatstánion io'heksen'tónnion aonakia'tawì:tshera tánon ióhskats ateweiá:ra. Teiohserá:ke tsi náhe taiontáhsawen wa'ekontsheráhrho "akonnón:kwe" tánon tsi niióhseres, ronakiohkowá:nen. tahoti'nikonhratihéntho ne ionthontahseronnia'táhkhwa.

Tsi nikarì:wes iaka'onwéskwani tsi wa'kahsennowáhnha'ne ne akó:wen ionthontahseronnia'táhkhwa tánon ne akó:wen iakokontsheráhrhon, tho ní:ioht tsi tekonwatiká:nere ne iakokontsheráhrhon tóka shí:ken akoio'okón:'a, konwatinorónhkhwa. Kwah akwé:kon iakokontsheráhrhon. Shahshakotiri'wanón:tonhse oh ní:ioht tsi iakothiatonhseraweiénston ne aierahstánion, teiakotonhontsió:ni aonsaiontoweienstá:na tánon iaiéhsa aonsaiontóweienste ne Iohahí:io. Teiakotonhontsió:ni akwé:kon tsi ní:kon aón:ton aieweientéhtahne ne aiekontsheráhrho tánon tho nón;we niiaka'onwéskwani aiontoweienstà:na. Iaka'on'wéskwani ne tsi niioiánere tsi iekontsheráhrhos, "Í:iah tha'teiokierónnion tsi nikaieron'tò:tens tánon tewatakà:ron tsi niwahsohkò:tens" tsi niiewennò:ten. Tho ní:ioht tsi iaka'onwéskwani aiekontsheráhrho né:'k tsi í:ienhre aieweientéhta'ne ó:ia niwaten'nikonhrò:ten tsi aiekontsheráhrho. Shahshakotiri'wanón:tonhse á:iontste tsi nahò:ten iakoterièn:tare ahonwatirihónnien tóka ó:ni ahonwatiià:taren ok ní:ioht tsi ahatíhsere ahonwatirihónnien ne rokstenhokón:'a ne Kaná:ta ahatikontsheráhrho, taiako'nikonhratihéntho ne ahonwatirihónnien. Wa'ì:ron, "Í:kehre thikawenní:io ónhka eniekwé:ni enieweientéhta'ne aiekontsheráhrho, tóka ó:ni aie'níkhon tóka ó:ni aieriserón:ni – aronhákien tó: nikakó:ion. Bonaparte ó:ni iaka'on'wéskwani iaiekontsheráhrho skáthne ne ronwanatero'okón:'a, ronwatirihwá:wis aontahontáweia'te tsi nón:we niiakoió'te aón:ton ahonteró:roke tánon skáthne ahatikontsheráhrho. Í:ienhre tsi nahò:tenk é:so tsi iaka'on'wéskwani tánon iakorihwá:wis ne sénha ahonwatinorónhkhwake ne ronwanatero'okón:'a. Ne ó:nenk ieniontahsónteren eniakoió'ten ne "akaónha iekontsheráhrhos konnón:kwe" tánon enkonwatiia'tinekénhwe tsi nón:we niiè:teron. Tánon tho nón:we eniakéhsake thí:kate iakoterien'tahtsheriá:skon tsi nenié:iere ne aiekontsherahrhóhseron.