Ratirentsken'tón:nis Ne Ó:nenhste

Rahiá:tons: Ohahonhkóhton

Ahkwesáhsne wahonwatihonkarawíhon thi ionkwehonwehseraténion wahonkia'tarò:roke Ohiaríha 15 – 17, Ratirentsken'tón:nis Ne Ó:nenhste. Meskwaki ne Iowa nithoné:non, Ojibwe ne Red Lake, Osage nikanakerahtso:yrn ne Oklahoma, onkwehshón:'ane Rotinonhsón:ni Kanakeráhtshera wa'thatihtharónnion oh nahatiié:re tahatirihwáhshnie tsi niwatonhnhehtsherò:ten ne ó:nenhste ne onkonkwé:takon.

Kiotenhniserakierénhton wa'kiakhinonhwará:ton ne ionkhinatahrenná:wi ó:nenhste kahse'rhonnià:ton (kanen'ón:ni), Kanonhséshne nón:we tsi iekhonnià:tha. Thó:ne ó:nen ia'akhiia'ténhawe Kanonhséshne tsi nón:we ne Kanien'kehá:ka Rotiia'néshon ratitsiénhaien tahonwatinonhwará:ton Ohén:ton Karihwatéhkwen tánon ne áhsen nikawén:nake. Thó:ne ó:nen wa'kiakwatateró:seron tsi nithonenónhseron tánon oh nonkié:ren tsi kén:tho iákwes. Kanenhrí:io tsi niiá:kon ia'tehonakiéhston ratiiénthos wahontakià:thewe ahonwatirihónnien tsi nihá:ti sénha ronatóweienston ratiiénthos.

Ne aorihón:ni ne Tewaratsken'tonnià:tha Ne Onenhsta'ón:we aetewatoweién:ton ne iorihwakaión:'on ne kanénha tóhsa aónhton. Onkwehshón:'a ne A'nowaráhne Kawè:note thonnéhtha na'teiotikióhkwake ne kanénha rotiienawá:kon raotiná:takon ronnéhsak ahonwatiié:nawa'se ok ní:ioht tsi ahontoweièn:ton. Khia'teiohserá:ke ontohseróhetste rotinenhaká:te rotirò:ron ne ó:nenhste osahè:ta tánon onon'ónsera / kioneritstakè:tote. Kwáh í:ken tsi ióhskats tsi ní:kon rotinenharò:ron ronatenaiéhston Kanonhséshne nonkwá:ti. Ókia'ke ne Kanakeráhtshera tontahonwatí:ion ne Kanenha'shón:'a ne kiokierenhtáhkwen raoná:wen ókia'ke ne kanénha tontahonwatí:ion ne Kanien'kehá:ka Rotiia'néshon. Ionkwatera'shwí:io tsi ionkwaiená:'on ókia'ke ne oròn:ia, onekwénhtara tánon otsì:nekwar nikanenhstó:ton kathe'seronnià:ton tánon ne ó:nenhste ne Red Lake nikiawé:non. Ojibwe roksténha Jack Dejarlait ronwà:ia'ts Red Lake nithawé:non raiénthoskwe tsi thanákere, raoná:takon. Énskak tsiotatén:ron ne eh ní:ioht. Rohsótha thó:wi. Í:rehre ne Kanien'kehá:ka Kanakeráhtshera aionenhstaién:take né:'e tsi roterién:tare tsi eh nón:we enionaktiióhake. Thó:ne ó:nen wa'akwaterennotónnion tánon wa'kiakwanónniahkwe ne onkwanonnnia'shon:'a, wa'kiakhi'nonhwará:ton ne ionkhinatahrenná:wi.

Tewenhniserakiehákie, wa'akwaienkóntho wa'kiakhinonhwará:ton ne kahehta'shón:'a wa'akhiiaterá:shwen tánon ne Kaié:ri Niionkwé:take enhonten'nikòn:raren ne kanenha'shón:'a tánon enhonwatiri'wanón:tonhse ne otsi'ten'okón:'a tóhsa akwé:kon ahón:neke ne kanenha'shón'a. Thó:ne ó:nen akwé:kon wa'akwatenenharò:roke skahéhta wa'akwaiéntho ne oròn:ia niwahsohkò:ten onenhsta'ón:we ronwaná:wi ne Kanien'kehá:ka Kanakeráhtshera. Wa'akhiiaterennóthahse ne kanenha'shón:'a tsi ionkwaienthonhákie tánon wa'akwakaratónnion tánon io'wesénhne ionkwathón:te rotiieshónnion né:'e tsi ne kanenha'shón:'a ionon'wéskwani nó:nen enionathón:tene nó:nen ónhka iakoten'nikonhró:ri ó:ni. Thó:ne ó:nen kanónhskon saiakwákien nó:nen sótsi on'taríha'te. Á:ienhrek akwé:kon ne shá:ka tsi teionkwa'nikónhrhare nó:nen iakwaiénthos tánon iakwatenenhatoweien'tónnions ne onkwaná:takon. Né:'e aorì:wa entá:on'k entewakia'tarò:roke tentewatate'nikonhrakará:tate ne iaetewatahsónteren tsi nikaio'tenhserò:ten entá:on'k enkaio'tén:'en. Í:iah tehshonkwahtká:wen ne Shonkwaia'tíson í:iah tha'ón:ton aetewa'nikonhró:kten, khéh aetewáhtka'we ne onkwanénha. Sha'teka'nikonhrò:ten ne ahsheiáhtka'we ne sheio'okón:'a.

Ionsaióhrhen'ne, ionsahonkia'tarò:roke ne onkwehshón:'a wa'onkhiié:nawa'se aiakwatoweien'tónnnion ne ken'niiohontésha ionkwaienthóhseron tsi niká:ien ikawátstha nón:nen teniakwatenonhwará:ton ne Kanonhséshne. Á:re akwé:kon tsi nihá:ti eh iákwes saiakwakaratónnion tánon saionkwaiéshon. Í:iah tekariì:wes ken'na'akwaié:re só:'k ok ná:'a ionkwáhshon. Énska ionsaká:iente saiakwakia'tarò:roke kanónhskon ne Ahkwesáhsne Rontatewenní:io Tsi Iontoweienstáhkhwa Kanenhí:io tsi ionteweien'tónhkhwa 37 niiothiá:ton iohatákie tsi iotená:tate Satsherá:ti tánon tonsaiakwatatenonhwará:ton ó:nen ki' wahe tánon niawenhkó:wa. Ne Kanien'kehá:ka Kanakeráhtshera wa'thonwatinonhwará:ton tsi niió:re nontahón:ne taionkhihshnienón:ra ne Ahkwesáhsne aiakwatoweièn:ton ne kanenha'shón:'a ientsiethiiatenniéhten tsi thotinónhsote ienhsatíhawe ne ken'niiohontésha, onekwénhtara nikanenhstò:ten, oien'kwa'ón:we tánon wáhta ohsésta.

Ne Ratirentsken'tón:nis Raotinèn:ra ronatehiahrónkie A'nowaráhne kawè:note. Thiionkwehonwehseraténion rontenenhstanónhna. Ne raotiio'ténhsera káhawe ne orihwakaión:seron na'teiotikióhkwake ne ó:nenhste tánon iaonsétewawe tsi ionkhiiahehsá:'on ne aethiiate'nikòn:raren.

Ne Onkwehón:we ne ó:nenhste ionkwe'tonnià:ton iehonwatihnón:ken ahonkia'tarò:roke ska'nikòn:ra aón:ton tsi nihonakióhkwa ne thiionkwehonwehseraténion ne kaié:ri na'tekahióhsake. Tsi nikionkwé:kon ontá:kerahkwe ne onkwakara'shón:'a tsi nahò:ten ionkhihró:ri, tánon tsi ní:ioht tsi ionkhinahehsá:'on ne aiakhiiaten'nikòn:raren ne onkwá:wen karihwanó:ron, wa'onkhiháhrhahse. Ne ionkhihsothokón:'a raotí:nenhste nitewéhtha ne aetewatóweienste tsi nén:we. Tsi í:we ón:wa nikahá:wi wa'karihwéntho ne onkwá:nenhste kiataténonhkwe ne watákie í:iah tha'teskiatahsón:teron ne tsi nahò:ten kionkwehtáhkon tánon ne ó:nenhste. Tsi ionatste'niá:ron tekonttihánion wathró:ri ne ó:nenhste. Tsi niionkwarihò:ten teioráhsaren ne tóhsa aónhton énska tenwen'niáwe niiohserá:ke. Tóhsa aónhton tonsakakahrhaté:ni ne aonsontónhnhete. Entá:on'k ne tentewatká:nere ne aohsatsténhsera ne ionkhihsothokón:'a tsi nahò:ten ronwatirhonnién:ni ne ó:nenhste aorihwá:ke. Ó:nen ieióhe aetewaiéntho. Ó;nen ieióhe ne ska'nikòn:ra aetewá:ton ne thiionkwehonwehseraténion onkwehshón:'a. Ahshehóntera'ne raoná:wen email tsi nihonathiá:ton: [email protected]