McGill Tsi Iontoweienstahkhwa'kó:wa Wahatinia'tarohá:ren Aionwátha Kania'taróhere

Ohiarí:ha, tewáhsen énska shiská:rahkwe, tsi tekahontsiakhánion thiionkwehonwehseraténion Onkwehshón:'a Raonenhnísera, McGill Tsi Iontoweienstahkhwa'kó:wa wahatinia'tarohá:ren ne Aionwá:tha Kahshwénhtha akia'tahnháhtshera. Tsi wa'thontenonhwará:ton, wa'konwatiià:taren ne Rotiskaré:wake Niioti'tarò:ten Wa'kerakátste Louise Herne, Sonny Diabo, McGill Raononkwè:ta Rokstén:ha McGill Raonkwè:ta, Ohén:ton Í:iete Suzanne Fortier, Kakwiranó:ron Cook, Tehshakorihwathètha, Thionkwehonwehseraténion Thatahsáhwha; Geoffrey Kelley,

Taiaontaní:kon Rakó:ra Ronwaniahehsá:'on ne Onkwehón:we Raotirihwá:Ke tánon Mark Miller, Kakorahtsherá:kon Raonokwè:ta Ne Ville-Marie - Le Sud-Ouest - Île-des-Soeurs, teiohkwatasé:ton, Kanáthen McGill tsi nón:we nihontoweiénstha.

Tewáhsen kaié:ri nikahwistá:'eke nikarì:wes é:neken nonkwá:ti ne Ratiráhstha Tkanónhsote wa'kania'tarohá:ren tánon McGill nonkwá:ti énsewawe tsi nikarì:wes tehatinonniáhkwe enhonten'nikonhró:ri, iehotirihónkien kíken iohseratákie ne Wískhaton, Seskehkó:wa 21, 2018.

"Né:'e ne tsi iontoweienstahkhwakó:wa, kwáh iorihowá:nen ionkwaio'tenhserá:ien aetewarihwakweniénhsthake ne Iorihwí:io Tanon Aonsetewarihwahserón:ni Raotikióhkwa ne Koráhne thonwatihnón:kon ne ken'niakaié:ren" Shakorihonnién:ni Fortier wahèn:ron. "Ken'neniakwá:iere nó:nen enkonkhí:nonke skáthne teniakwarihwaié:na ne thiionkwehonwehseraténion raotiná:ta tánon tsi nihá:ti kiokwateróhon, é:so tsi enionkwatonhnhá:rake tánon eniokwa'nikonhriióhake. Kí:ken ontohseróhetste, taiakwatáhsawen ne Thiionkwehonwehseraténion Ata'karitéhtshera Ronaterihón:ton Ratíhsere, Kanien'kéha – Owén:na rontoweiénstha, tánon né:'k ne tsiahiáksera tsi náhe, McGill wa'karihó:wanahte tehontkénnies enhonwatihwíston ne Thiionkwehonwehseraténion tewa'á:raton rontshwà:tha."

Wahatinia'toharónnion tánon ienkakón:takwe enkania'tarohá:rake ne SUNY Potdam tánon Tsi Tkahio'tsísto Iontoweienstahkhwa'kó:wa, akté:shon nón:we.