A Voice from the Eastern Door
A Voice from the Eastern Door
Levi Oakes skátne í:nete ne Dwight Bero, Iekó:ra Little tánon SRMT Chief Michael Conners Jr.
SRMT Chief Michael Conners Jr., American Legion Post 1479 Adjutant Dwight Bero tánon New York State Senator Betty Little (R, C, IP-Queensbury), 45th Senate Wahti'horóksi ne Kanahstónhkwa wa'thonwarénhsaron Levi Oakes ne Kanón:no Kanón:no Ohstoronòn:ke Watatewenní:io Ohwistanó:ron Ronateriiohsónhne Kanónhsote ne Ratihsennowá:nens
Dwight Bero wa'thniié:na Iekó:ra Little wahonwaháhrhahse Levi Oakes ne raó:wen Kanónhsote ne Ratihsennowá:nens kanahstónhkware. Wahonwahiatónhsera ne tsi wahonwaién:tere'ne tánon ska'neróhkwa ne otsikhè:ta
Levi Oakes' shakotere'okón:'a wahshakona'thé:ron Iekó:ra Little wenserákon óhonte ionnià:ton. Iakoráhston ne Marsha White.
NYS Iekó:ra Betty Little tánon Ahkwesáhsne Kanien'kehá:ka Ratirihwahséhtha (tehatiwennaténies) Levi Oakes.
Rotihsennowá:nens rón:neskwe wa'thonwanonhwará:ton ne Levi Oakes. SRMT Chief Beverly Cook wa'thonwanón:waron ne Mr. Oakes.
MCA Grand Chief Abram Benedict wahononhwará:ton ne Mr. Oakes kwáh ieká:ien tsi tehotén:tshon tsi nikarì:wes rothonkaria'kòn:ne.
Mr. Oakes kwáh ieká:ien waha'onwéskwen kon'takie wa'thonwarénhsaron skáthne tehonhsonterákies ne shakoio'okón:'a. (L to R) shakoio'okón:'a Wallace, Raymond and Louis Jr. tánon skahoio'okón:'a tsionathonwí:sen Debbie, Dora and Diane. Iakoráhston ne Marsha White.
Iekó:ra Little ó:ni wa'thonwanonhwará:ton ne WWII roteriióhne Barney Rourke. Iakoráhston ne Marsha White.
Ahkwesáhsne Kanien'kehá:ka Ratirihwahséhtha (tehatiwennaténies) tánon Congressional Kahwistarà:ken Ohwistanó:ron wahaié:na Louis Levi Oakes wahón:ion ne Kanón:no Ohstoronòn:ke Watatewenní:io Ohwistanó:ron. Iekó:ra Betty Little ne Ohiarí:ha 8, 2018 ne American Legion Post 1479. Kanón:no Ohstoronòn:ke Watatewenní:io Ohwistanó:ron né:'e aonhá:'a é:neken kiótkon ne ón:kwe ahonwahsennakará:tate tahóntka'we ne Kanón:no
Ohstoronón:ke tánon ne enhonwatiháhrhahse ne tsionkwe'tátshon tehonatén:tshon kwáh ísi nón:we ronahkwisrón:'on ronatatshináhston tánon shakotiienawá:se ne onkwehshón:'a.
Kí:ken ohwistanó:ron wahonwaháhrhahse ne Levi Oakes tsi nahá:iere ne Ahkwesáhsne Kanien'kehá:ka Ratirihwahséhtha (tehatiwennaténies) ne shiwaterí:io WWII. Ó:ni, ne kanahstónkwa wahati'horóksi wa'thonwarénhsaron Oakes wahonwahsennínion'te ne Kanón:no Wahstoronón:ke Rakó:ra Ronateriióhshion Ronkia'tarohrókstha ne Ratihsennowá:ne ne Onerahtohkó:wa 15, 2018.
Levi Oakes ne shaià:ta ne tsiá:ta iawén:re Ahkwesáhsne Kanien'kehá:ka wahonwatiién:tere'ne ne Ohstoró:non Kakoráhtshera ne Onkwehón:we Ratirihwahséhtha (tehatiwennaténies) . Mr. Oakes sha'té:kon iawén:re sha'teha'ohseriiá:kon iehotatshenninión:ton rothonkariá:kon tánon ià:ia'k niiiohserá:ke nikarì:wes wahshakoio'ténhse raronwarahéhrha kaié:ri tsi kahiá:ton skáthne kenkiohkwaien B's 442nd Signal Battalion.
Wahonwarihónnien tsi nenhá:iere ne v. Tahontén:rohwe thihatiià:tate Ahkwesáhsne Kanien'kehá:ka tsi nikarì:wes ié:rekskwe ne Louisiana. Tsi nikarì:wes shiwaterí:io WWII, ne Kanien'kéha owén:na, skawén:na ne áhsen niwáhsen áhsen nikawén:nake ne Onkwehonwenéha iewatenniéhton tahatihtharónnnion tsi na'tehónteron. Ne Onkwehón:we Ratirihwahséhtha (tehatiwennaténies) ohontsiakwé:kon ronwatiienté:ri né:'k rononhá:'a rotí:ien ne í:iah tha'tehotiwennahríhton ne tsi nontaiohtonhákie, ne Tehotikahro'thí:ie í:iah nonwén:ton tehotikwénion ahonthró:ri oh nahò:ten kén:ton tsi nikarì:wes shiwaterí:io WWII.
TEC 4 Oakes rotio'tén:ne ne Ratirihwahséhtha (tehatiwennaténies) ne South Pacific, New Guinea tánon Philippines tsi nikarì:wes shiwaterí:io WWII tánon wahonwaháhrhahse ne Kahwistarà:ken Otsistóhkwa tsi ní:kon wahshakoié:nawa'se. Ne Kahwistarà:ken Otsistóhkwa né:'e ne ahsénhaton nikiótte ronathonkariiá:kon tewaterí:io iontenonhsahseronnia'táhkhwa ratatsináhstha nó:nen tehonatakiénhton tsi niká:ien ronwáhshons ne Ohstoronòn:ke.
Oakes kwáh ísi nón:we tsi niióhskats tsi ní:ioht tsi wahshakohshnié:non tánon tsi tontahonwáhtka'we wathonwarenhsarónnion ne Enníska 15, 1946.
Oakes áhsen niwáhsen niiohserá:ke nikarì:we karista'kehró:non í:ken. Karistà:ke wahoió'ten, Tsistekeriia'kon:ne (Dosyowëh - Buffalo, NY) tánon oh nà:ken ohahowanén:ne Kanèn:raien ne Ahkwesáhsne, ohén:ton tsi niió:re wahatoríshen. Ón:wa nikahá:wi kióhton niwáhsen wísk na'teha'ohserii'a:kon, ne:'k raonhá:'a shotatén:ron Ahkwesanse Kanien'kéha Ratirihwahséhtha (tehatiwennaténies) ahonwaién:tere'ne tahonwarénhsaron, tsi nihatatshináhstha tsi nikarì:wes shihaià:tare, shihothonkariá:kon. Tsi niha:ti ne raohwá:tsire rón:nes, Oakesó:ni iehatiia'taié:ri Ohstohró:non Legion Honor Guard (ra'nikòn:rare) ratihsennaowá:nens táon ratiwennaráhstha Othorè:ke nithoné:non.
Reader Comments(0)