Ionkwa'nikonhriiósne Ka'nikhónhshne Wahonwatirihónnien Oh Ní:ioht Tsi Ahonkia'tawi'tsherón:ni

Iehiá:tons: Mahlon Smoke

Peace Tree Mall, Akwesasne – Ne Ionkwa'nikonhriiósne ka'nikhónhshne tsi ionkia'tarohrókstha tékeni ia'tká:ienhte wahonkia'tarò:roke wahonwatirihónnien ronnón:kwe oh ní:ioht tsi ahonkia'tawi'tsherón:ni ne ronónha raoná:wen io'nheksen'tónnion onkwehonwehnéha akia'tawì:tshera. Sheree Bonaparte wahonwatinónhsani tánon Kelly Marshall wahonwatirihónnien, tetsiá:ron wahonwatiiénawa'se ne kanèn:ra tsi nón:we kiokierenhtáhkwen aontaiontáhsawen naionkia'tawi'tsherón:ni ne onkwehonwehnéha akia'tawì:tshera io'nheksentónnion.

Ne arihón:ni wahonwatiháhrhahse ne ahontóweienste i:iah né:'k té:ken nahonwatirihónnien ne ahati'níkhon ó:ni ahonwatiríhon ne ronnón:kwe thikawenní:io tó: nithotí:ions ne kanatakwé:kon ahatitó:kenhte tsi nihonaten'nikonhraká:te ne eh nón:we niiorihwá:ke. Ne:'e aorì:wa wahonwatihnhotónkwahse ahontóweienste, wa'onthró:ri ne Bonaparte, ahonwatihretsiá:ron ne ahonten'nikonhrísa tánon tsi ní:ioht tsi rotikwénion ne ronnón:kwe ne kanatakwé:kon, nó:nen rati'nikhónhsere. "Okia'ke kwáh é:so tsi ionnià:ton ahontahkwennión:ni ohontsiakwé:kon ronnón:kwe," wa'ì:ron ó:ni ókia'ke ne ronnón:kwe tho ní:ioht tsi tehatiká:nere í:iah ne' thé:nen tehotirì:waien tóka ó:ni í:iah ne' thé:nen tehotirihwá:ke. Ne:'k tsi Bonaparte kwáh ieká:ien tsi kiakawehtáhkwen naie'níkhon akwé:kon aón:ton ken'niahatí:iere tánon kiakawehtáhkwen ió:ien ne akwé:kon aiakoweientehtá:'on. Akwé:kon tsi nihá:ti ratiià:tare thoti'nikonhrahsa'áhton tsi ronkia'tawi'tsherón:ni, í:kare ne wahatiristáhrho, wahti'níkhon, tánon wahonhkwísron akwé:kon aontakaieríhake tsi ní:ioht tsi ahati'níkhon.

"Né:'e aonhá:'a wahtkahthohtsherí:io ahsheiaterò:roke kí:ken ronnón:kwe wahonkia'tawi'tsherísa" Bonaparte wa'ì:ron ne kwáh aonhá:'a wa'enón:we'ne tsi nikanenhrò:ten ne ronnón:kwe wahonwatirihónnien tsi wahonkia'tawi'tsherón:ni.

Bonaparte iakohrhá:re aiehnhotón:ko ne sénha nia'té:kon ahonwatirihónnien ne tenkaká:nerake ne ahonnonniánion ne iontsinonhrókstha, akia'tawi'shón:'a, tánon tóka ó:ni kwáh ienkará:ta'ne ne Kanien'kéha owenna'shón:'a ienié:iehste tsi nahò:ten ne ie'nikhónhkhwa iontstha'shón:'a. Kí:ken awenhni'tarákie ienkará:ta'ne Ionkwanikonhriiósne Ronaterien'tahtsheriá:kskon Rati'níkhons Tsi Ionkia'tarohrókstha kiokierenhtáhkwen tsiohsera nikarì:wes shikahnhotónkwen tánon Bonaparte ierihwahseronniánions enkie'seronnenhtánion tánon oh nahò:tenk ióhskats enierihwahserón:ni nó:nen ienkáhewe.