Ohkwari’kó:wa - 2

Tehniiáhse sahni’niá:ken’ne. Sahiathró:ri tsi na’á:wen. Wahonwarón:tate ne ohkwari’kó:wa wahonákhwen tánon tonsahatkahrhaté:ni tánon wahshakóhon’te ne rontó:rats.

É:so sahonte’nién:ten ne ahonwáhton’te ne ohkwari’kó:wa né:k tsi í:iah tehotikwénion. Ronakiohkowá:nen ne rontó:rats sahshakóhton’te. Thó nikarì:wes í:iah tesehshakotí:ken ne kario’ta’shón:’a. Tahoti’serón:nenhte ne kenkióhkwa, í:iah khekaié:ri tha’teshontskà:nhons, rontonhkáriaks tánon wahotinonhwákten. Tsi nikaná:ta ronwatshá:nis ne ohkwari’kó:wa. Ahsontakwé:kon otsienhákta ratítskote ne onkwehshón:’a né:’e tsi ronaterién:tare tsi ne ohkwá:ri tsi ratistshá:nis ne tsi nón:we iotékha. Kwáh shonathón:te tsi niiorakaré:ni ne ohkwari’kó:wa entháhsa’ke ne kahrhá:kon nón:we. Ákta rawehtonhákie tsi ratinákere tánon ronaterién:tare tsi tóka sénha enhatonhária’ke ronónha enhshako’wá:rake.

Áhsen nihá:ti ne rontate’ken’okón:’a áhsen niwahsón:take ne shá:ka wahonatétshen. Wahonatétshen tsi wahonwário ne ohkwari’kó:wa. Ne tsi ní:ioht tsi wahonatétshen wahón:nehrek tóka ne kén:ton ne ahonhtén:ti tánon ahonwário ne ohkwari’kó:wa.

Óksak wahontateweienén:ta’ne tánon wahonhtén:ti. Í:iah tekarì:wes só’k khná:’a wahontkátho ne ohkwari’kó:wa tehahsi’taierón:ni. Kwáh ken’ nikarì:wes wahatíhsere ne tehahsi’taierón:ni. Ó:nen ki’ iahonwahóntera Tóka’ nón:wa ne shá:ka rotetshén:’en ne ohkwari’kó:wa. Kwah tsik niió:re wahshakó:ken ne áhsen nihá:ti rontó:rats wahaté:ko tsi ia’tewatshénthos.

1. Tehniiáhse sahni’niá:ken’ne Two got away

2. Sahiathró:ri tsi na’á:wen. They told again what happened

3. Wahonwarón:tate ne ohkwari’kó:wa They shot at the bear

4. Wahonákhwen tánon tonsahatkahrhaté:ni He got mad and he turned around

5. Wahshakóhon’te ne rontó:rats. He did away with the hunters

6. É:so sahonte’nién:ten ne ahonwáhton’te ne ohkwari’kó:wa né:k tsi í:iah

tehotik wénion. They tried often to do away with the bear but they couldn’t do it

7. Ronakiohkowá:nen ne rontó:rats sahshakóhton’te. He lost a lot of hunters

8. Thó nikarì:wes í:iah tesehshakotí:ken ne kario’ta’shón:’a.

They did not see the wild animals again

9. Tahoti’serón:nenhte ne kenkióhkwa The group lessened

10. Í:iah khekaié:ri tha’teshontskà:nhons They did not have enough to eat

11. Rontonhkáriaks tánon wahotinonhwákten They are hungry and they got sick

12. Tsi nikaná:ta ronwatshá:nis ne ohkwari’kó:wa. The entire village feared the big bear

13. Ahsontakwé:kon otsienhákta ratítskote ne onkwehshón:’a

All night, the people sat beside the fire

14. Né:’e tsi ronaterién:tare tsi ne ohkwá:ri tsi ratitshá:nis ne tsi nón:we iotékha

Because they knew the bear feared the fire

15. Kwáh shonathón:te tsi niiorakaré:ni ne ohkwari’kó:wa entháhsa’ke ne kahrhá:kon nón:we. They heard the loud cough of the bear in the forest

16. Ákta rawehtonhákie tsi ratinákere He is moving closer to where they live

17. Ronaterién:tare tsi tóka sénha enhatonhária’ke They know if he gets hungrier

18. Ronónha enhshako’wá:rake He will eat them

19. Áhsen nihá:ti ne rontate’ken’okón:’a áhsen niwahsón:take ne shá:ka wahonatétshen. 3 brothers had the same dream 3 nights

20. Wahonatétshen tsi wahonwário ne ohkwari’kó:wa.

They dreamt they killed the big bear

21. Ne tsi ní:ioht tsi wahonatétshen wahón:nehrek tóka ne kén:ton ne ahonhtén:ti tánon ahonwário ne ohkwari’kó:wa.

The manner of their dream made them think it meant they should leave and kill the bear

22. Óksak wahontateweienén:ta’ne tánon wahonhtén:ti They got ready right away and they left

23. Í:iah tekarì:wes só’k khná:’a wahontkátho ne ohkwari’kó:wa tehahsi’taierón:ni.

It wasn’t long then they saw the tracks of the big bear

24. Kwáh ken’ nikarì:wes wahatíhsere ne tehahsi’taierón:ni.

A long time they followed his footprints

25. Ó:nen ki’ iahonwahóntera Now they caught up with him

26. Tóka’ nón:wa ne shá:ka rotetshén:’en ne ohkwari’kó:wa.

Maybe the big bear had the same dream

27. Kwah tsik niió:re wahshakó:ken ne áhsen nihá:ti rontó:rats

Just as soon as he saw the 3 hunters

28. Wahaté:ko tsi ia’tewatshénthos. He ran away to toward the setting sun